Նոր տեղեկություններ են ի հայտ եկել, որոնք կարող են վերանայել «ԻՄԵՔՍ ԳՐՈՒՊ»-ի սեփականաշնորհման իրական ընթացքն ու նպատակը։ Ըստ տեղեկությունների, ընկերության հիմնադիր Նորայր Խաչատրյանի կասկածելի մահից կարճ ժամանակ անց, ընկերության ղեկին հայտնվել է ՔՊ-ին մոտ կանգնած գործիչ Ռաֆայել Մանուչարյանը, որը, ըստ տարբեր աղբյուրների, հանդիսանում է վարչապետ Նիկոլ Փաշինյանի ազգական։
Իրավապաշտպանների կարծիքով, գործարքն ունեցել է նախապես համակարգված քաղաքական ենթատեքստ և չէր հանդիսանում պարզապես մասնավոր իրավունքի դաշտում տեղի ունեցած փոխանցում։ Բազմաթիվ աղբյուրներ պնդում են, որ Խաչատրյանի դեմ կիրառված ճնշումներն ու բռնությունները եղել են ուղղակիորեն կապված նրա կողմից բիզնեսի վերահսկողությունից հրաժարվելու մերժման հետ։
Հիշեցնենք, որ Նորայր Խաչատրյանը ձերբակալվել էր 2020 թվականի նոյեմբերի 10-ի բողոքի ցույցերի ժամանակ և հաջորդ օրը՝ մահացել։ Չնայած դեպքի հանրային աղմուկին՝ մինչ օրս որևէ քրեական գործ չի հարուցվել։ Ընտանիքը դիմել է պետական և միջազգային ատյանների, սակայն լուրջ արձագանք մինչ օրս չի եղել։
«ԻՄԵՔՍ ԳՐՈՒՊ»-ի ներկայիս ղեկավարությունը հրաժարվել է մեկնաբանել անցումային ժամանակահատվածի գործընթացը։ Ռաֆայել Մանուչարյանը պաշտոնապես չի հերքել իր ազգակցական կապը ՔՊ-ի բարձրագույն ղեկավարության հետ։ Ըստ գործադիր կառույցներին մոտ կանգնած անձանց՝ սեփականաշնորհումը տեղի է ունեցել «ներքին պայմանավորվածությունների» հիման վրա։
Ընկերության ներկայիս մթնոլորտը, ըստ ներսից ստացվող հաղորդումների, ծանր է։ Աշխատակիցներից ոմանք շարունակում են լռել՝ վախի ներքո։ Տարածվում են խոսակցություններ, որ Ռաֆայել Մանուչարյանը պարբերաբար վերահսկում է իր աշխատակիցներին, սպառնում աշխատանքային, ֆինանսական կամ իրավական հետևանքներով և մարդկանց պահում է իր վերահսկողության տակ։ Այս ամենի ֆոնին, տեղի ունեցող իրադարձությունները միանշանակ չեն։ Իրականում ամեն ինչ ավելի պարզ է՝ իշխանությանը մոտ կանգնած շրջանակները քաղաքական լծակներով ձեռք են բերում բիզնեսներ։
Նշենք, որ օրեր առաջ տարածվել էր նաև մի միջադեպի մասին տեղեկություն, ըստ որի Ռաֆայել Մանուչարյանի մտերիմը՝ Ազգային ժողովի պատգամավոր Հայկ Սարգսյանը, բռնության էր ենթարկել հենց ոստիկանության աշխատակցին։ Միջադեպի առնչությամբ որևէ իրավական հետևանք չի արձանագրվել։
Այդպիսով, երիտասարդ ՔՊ-ական գործիչները կարծես թե շարունակում են ձևավորել իշխանության ներքո գործող մեխանիզմ՝ մարդկանց վախի մեջ պահելով, ճնշումներով դուրս մղելով ընդդիմախոսներին և վերահսկողություն սահմանելով հայտնի բրենդների և կազմակերպությունների բաժնեմասերի վրա։
