ԵՐԵՎԱՆ – Քաղաքագետ և հասարակական ակտիվիստ Սևակ Սուքիասյանը, որը երկար տարիներ հանդիսացել է ՀՀԿ անդամ և համակարգել է «Միասնական Հայաստան» հասարակական կազմակերպության գործունեությունը, հայտարարել է, որ ապրիլին ներկայացրած իր բողոքը Հայաստանի մարդու իրավունքների պաշտպանին (ՄԻՊ)՝ վերջին իրավական հույսն էր Հայաստանում արդարություն գտնելու համար։
Սուքիասյանը հայտնել է, որ իր ներկայացրած դիմումը վերաբերում է սեփական և իր կնոջ՝ Նաիրա Հովհաննիսյանի նկատմամբ կիրառված բռնություններին, ոստիկանության և դատախազության անգործությանը, ինչպես նաև շարունակվող քաղաքական հետապնդումներին։ Ըստ նրա՝ իրավապահ մարմինները հետևողականորեն անտեսել են իրեն ենթարկված ֆիզիկական և հոգեբանական ճնշումները, իսկ իր նկատմամբ բողոքները կամ չեն գրանցվել, կամ փակվել են առանց քննության։
«Իմ և կնոջս նկատմամբ իրականացված բռնություններից հետո, մենք դիմեցինք ոստիկանություն, սակայն որևէ քննություն չկատարվեց։ Հետագայում նույնիսկ իմ բողոքները պարզապես անհետացել էին։ Դիմում ներկայացրի նաև դատախազություն, սակայն պարզվեց՝ այն ևս անարդյունք է։ Այդ պատճառով ստիպված եղա դիմել Մարդու իրավունքների պաշտպանին՝ որպես վերջին միջոց», — նշել է Սուքիասյանը։
Վերջինս տեղեկացրել է, որ ունեցել է հեռախոսազրույց ՄԻՊ աշխատակազմի ներքին աուդիտի բաժնի պետ Արա Հարությունյանի հետ, որը խոստացել է հարցը ուսումնասիրել և հնարավորինս արագ արձագանքել։
Սուքիասյանի խոսքերով՝ ներկայիս իրավիճակը վկայում է այն մասին, որ Հայաստանում ընդդիմադիր գործիչները զրկված են անվտանգության և արդարության երաշխիքներից։ «Սա իմ վերջին հույսն էր։ Եթե սա ևս արդյունք չունենա, նշանակում է՝ մեզ ոչ մի օրենք չի պաշտպանում, և մեզ մնում է միայն լռել և հանդուրժել», — ասել է նա։
