Հետընտրական գործընթացների մասով ես դրական եմ տրամադրված, ակնկալում եմ շատ լավ արդյունքներ, գնում ենք դեպի հաղթանակ։ Այս մասին մարտի 28-ին NEWS.am -ի թղթակցի հետ զրույցում ասաց «Իմ հզոր համայնք» կուսակցությունից Գյումրիի քաղաքապետի արտահերթ ընտրություններում քաղաքապետի թեկնածու Ռուբեն Մխիթարյանը։
«Մարտի 31-ի գիշերվա երկրորդ և երրորդ սցենարը մտքում ունենք: Քաղաքացիներին խնդրում եմ անտարբեր չլինել իրենց քաղաքի ու երկրի ճակատագրի նկատմամբ։ Սա մեր հասարակության ամենամեծ խնդիրն է։ Մենք դարձել ենք անսիրտ օրգանիզմ, ժամանակն է շրջելու էջը: Բոլորի ձայնը կարևոր է, Գյումրիում գրանցվածները, բայց այլ վայրերում ապրող ընտրողները պարտավոր են մասնակցել քվեարկությանը»,- նշեց նա։
Մխիթարյանը կոչ արեց ձայն տալ ինը քաղաքական ուժերից որևէ մեկին, բացի երկուսից։ «Ես վստահություն չունեմ, որ Եվրոդաշինքը չի միանա իշխող կուսակցությանը»,- պարզաբանեց նա։
Ընդդիմադիրը հավելեց, որ իր համար կանխատեսելի էր բանավեճերի երեկվա ընթացքը:
«Իշխող կուսակցության թեկնածուն, ինչպես և սպասվում էր, կոնկրետ հարցերի պատասխաններ չտվեց։ Երեկ Սարիկ Մինասյանը գյումրեցիներին մեղադրել է, թե իբր նախկինում գումար են վճարել, որպեսզի իրենց երեխաները Արցախում չծառայեն, սակայն նա չի կարողացել որևէ կոնկրետ օրինակ բերել: Ավելին, սա ասում է մի մարդ, ում ընկերները, անհասկանալի պատճառներով, չեն ծառայել բանակում (Շիրակի մարզպետ Դավիթ Առուշանյան) կամ ում որդիները չեն ծառայել իբր գիտական գործունեություն ծավալելու պատրվակով (պատգամավոր Անդրանիկ Քոչարյանի որդին) և այլն։
Նա նաև չկարողացավ օրինակ բերել, թե ով է մասնաբաժին ունեցել քաղաքի հյուրանոցային բիզնեսում, ինչի մասին խոսեց Մինասյանը»,- ընդգծեց Մխիթարյանը։ Ըստ նրա՝ իշխանությունները 7 տարի է, ինչ քաղաքում ոչ մի շենք չեն կառուցել։ Այս գումարի դիմաց հնարավոր կլիներ կառուցել ավելի քան 10 շենք՝ 200 բնակարանով։
Մենք մեր քարոզարշավի ընթացքում մեր քաղաքացիներին ցույց տվեցինք իշխանությունների իրական դեմքը։ «Այս մարդիկ պատրաստ են ամեն ինչի իրենց աթոռների համար»,- եզրափակել է Մխիթարյանը։
