Մայիսի 9-ին ԱՄՆ-ի Վեն Նայս քաղաքում գտնվող հայկական եկեղեցու տարածքում տեղի ունեցած հավաքի ժամանակ գործարար և հասարակական ակտիվիստ Արամ Խաչատրյանը հանդես է եկել հրապարակային ելույթով՝ անդրադառնալով Հայաստանի ներսում ձևավորված կոռուպցիոն համակարգին, պետական պաշտոնյաների անպատժելիությանը, ինչպես նաև իր նկատմամբ տարիներ շարունակ իրականացված ճնշումներին և հետապնդումներին։
Ելույթի ընթացքում Խաչատրյանը նշել է, որ իր գործարար գործունեության տարիներին բազմիցս ենթարկվել է շորթման, սպառնալիքների և տարբեր տեսակի ճնշումների, իսկ հասարակական ու քաղաքացիական դիրքորոշման հրապարակային արտահայտումը, ըստ նրա, խորացրել է խնդիրները՝ տարածվելով նաև ընտանիքի անդամների վրա։
Նրա փոխանցմամբ՝ տեսանյութի հրապարակումից հետո ստեղծված իրավիճակը լրջորեն սրվել է, ինչի հետևանքով նա ստիպված է եղել լքել Հայաստանը՝ սեփական անվտանգության նկատառումներով։ Գործարարը շեշտել է, որ իր գնահատմամբ երկրում համակարգային փոփոխություններ չեն տեղի ունեցել, և կոռուպցիայի դեմ խոսող անձինք շարունակում են գտնվել վտանգի ներքո։
Արամ Խաչատրյանը հավելել է, որ իր հրապարակային խոսքը քաղաքական նպատակներ չի հետապնդել, այլ միտված է եղել հասարակական խնդիրների բարձրաձայնմանը և մարդու իրավունքների խախտումների վերաբերյալ ուշադրություն հրավիրելուն։ Նրա խոսքով՝ այս փուլում Հայաստան վերադառնալը իր համար անվտանգ չի համարվում։
Աղբյուր՝ Armrus.news
Նյութը վերատպվել է սկզբնաղբյուրի նշումով։
Հեղինակային իրավունքները պահպանվում են։
