ԱՄՆ ներգաղթի և մաքսային հսկողության ծառայության (ICE) ժամանակավոր տնօրեն Թոդ Լայոնսը CBS News-ին տված բացառիկ հարցազրույցում հայտարարել է, որ գործակալները կձերբակալեն բոլոր անօրինական ներգաղթյալներին՝ նույնիսկ նրանց, ովքեր դատվածություն չունեն։
Առաջնահերթությունը կտրվի լուրջ քրեական անցյալ ունեցող օրինախախտներին, սակայն ձերբակալությունները կվերաբերեն նաև «ոչ քրեական» անձանց, հատկապես «ապաստան-քաղաքներում», որտեղ տեղական իշխանությունները հրաժարվում են համագործակցել ICE-ի հետ։
Լայոնսը նշել է, որ քանի որ բանտերը հրաժարվում են անօրինական ներգաղթյալներին հանձնել դաշնային ծառայություններին, գործակալները ստիպված են լինում մտնել համայնքներ, ինչը հանգեցնում է այսպես կոչված «կողմնակի» ձերբակալությունների աճին, երբ ձերբակալվում են անձինք, որոնք գործողության թիրախ չեն, սակայն երկրում գտնվում են անօրինական։
Այս պրակտիկան սահմանափակվել էր Ջո Բայդենի վարչակազմի օրոք, սակայն անմիջապես վերականգնվել է հունվարին Թրամփի վերադարձով։ Նոր վարչակազմը նաև տասնյակ միլիարդավոր դոլարներ է տրամադրել ICE-ին՝ արտաքսումներն արագացնելու համար։
Ըստ Լայոնսի, տարեկան 1 միլիոն արտաքսման նպատակը նոր ֆինանսավորման պայմաններում «հնարավոր է»։ Թրամփի պաշտոնավարման առաջին կես տարվա ընթացքում ICE-ն արդեն արտաքսել է շուրջ 150 հազար մարդու։
