ԱՄՆ պետքարտուղար Մարկո Ռուբիոն Fox News Radio-ին տված հարցազրույցում հայտարարել է, որ Վաշինգտոնը և Մոսկվան այս շաբաթ դիվանագիտական շփումներ են ունեցել՝ Ուկրաինայում պատերազմը դադարեցնելու ուղիներ գտնելու համար։
Ըստ նրա՝ բանակցություններ Ռուսաստանի ղեկավարության ներկայացուցիչների հետ տեղի են ունեցել, սակայն որևէ շոշափելի առաջընթաց չի գրանցվել։
«Մենք շարունակում ենք երկխոսությունը, քանի որ ցանկացած պատերազմ ավարտվում է բանակցություններով։ Բայց առայժմ մենք որևէ պատճառ չունենք խոսելու որևէ փոփոխության մասին»,- ընդգծել է Ռուբիոն։
Նա միաժամանակ հիասթափություն է հայտնել Մոսկվայի դիրքորոշման կապակցությամբ, որն, ըստ ԱՄՆ պետքարտուղարի, իր խոսքերը գործողություններով չի հիմնավորում։
«Նախագահը հստակեցրել է. եթե Ռուսաստանը խաղաղություն է ուզում, մենք պատրաստ ենք օգնել: Սակայն չենք կարող լուրջ ընդունել խաղաղության ազդանշանները, երբ առավոտյան զանգ է հնչում, իսկ երեկոյան Խարկովի վրա հրթիռներ են արձակվում»,- նշել է նա:
Ռուբիոն հաստատել է, որ Միացյալ Նահանգները չի հրաժարվում դիվանագիտական ուղուց՝ չնայած ստեղծված իրավիճակի բարդությանը։ Նա ընդգծել է, որ Միացյալ Նահանգները «կլինի Ուկրաինայի կողքին մինչև հակամարտությունը լուծվի արդար պայմաններով»։
