Ռուսաստանի կառավարության առաջատար կիբերլրտեսության ստորաբաժանումներից մեկը տեղական ինտերնետ մատակարարների միջոցով վնասաբեր ծրագրեր է տեղադրում Մոսկվայի դեսպանատներում և դիվանագիտական հաստատություններում, հինգշաբթի հայտարարել է Microsoft-ը։
Ինչպես նշում է Reuters-ը, ըստ Microsoft Threat Intelligence-ի եզրակացությունների, անցկացված վերլուծությունն առաջին անգամ հաստատում է, որ Ռուսաստանի Դաշնային անվտանգության ծառայությունը (ԱԴԾ) կիբերլրտեսություն է իրականացնում ինտերնետային ծառայություններ մատուցողների մակարդակով։
«Microsoft-ն այժմ վստահ է, որ այս գործունեությունը տեղի է ունենում Ռուսաստանում», — Reuters-ին հայտարարել է Microsoft-ի սպառնալիքների վերլուծության ռազմավարության տնօրեն Շերոդ Դեգրիպոն։
Microsoft-ի եզրակացությունները հրապարակվել են Մոսկվայի վրա Վաշինգտոնի աճող ճնշման՝ Ուկրաինայում հրադադարի համաձայնության գալու և ՆԱՏՕ-ի երկրների կողմից Ռուսաստանի վերաբերյալ իրենց մտահոգությունների պատճառով պաշտպանական ծախսերը մեծացնելու խոստումների հետնապատկերում։
Վերլուծությունը հետևում է ԱԴԾ-ի կիբերլրտեսական արշավին, որը փետրվարին թիրախավորել էր Մոսկվայում օտարերկրյա դեսպանատները։ Ընկերությունը պնդում է, որ ԱԴԾ-ի գործունեությունը նպաստում է թիրախային համակարգիչների վրա հատուկ back door-ների տեղադրմանը, որոնք կարող են օգտագործվել լրացուցիչ վնասաբեր ծրագրեր տեղադրելու և տվյալներ գողանալու համար։
Reuters-ին չի հաջողվել պարզել, թե հատկապես որ երկրների դեսպանատներն են թիրախավորվել։
