Ուկրաինայի նախագահ Վլադիմիր Զելենսկին հայտարարել է ԱՄՆ առաջնորդ Դոնալդ Թրամփի հետ հեռախոսազրույցի մասին: Իր թելեգրամյան ալիքում նա երկխոսությունը բնութագրել է որպես կառուցողական և ընդգծել, որ կայուն խաղաղության հաստատումը դարձել է հիմնական թեմա:
«Արդյունավետ զրույց նախագահ Թրամփի հետ: Հիմնականը, իհարկե, պատերազմի ավարտն է: Մենք շնորհակալ ենք Միացյալ Նահանգների նախագահին արդար և երկարատև խաղաղությանն ուղղված բոլոր ջանքերի համար»,- նշել է Ուկրաինայի առաջնորդը:
Կողմերը քննարկել են նաև պաշտպանական համագործակցության հեռանկարները: Զելենսկին հայտնել է, որ Կիևը պատրաստել է անօդաչու համակարգերի վերաբերյալ համաձայնագրի նախագիծ և դրա մանրամասն քննարկման հույս ունի: Նրա բնորոշմամբ, այս փաստաթուղթը կարող է դառնալ Ուկրաինայի և Միացյալ Նահանգների միջև ամենակարևոր գործարքներից մեկը:
Քննարկման ընթացքում կողմերն անդրադարձել են նաև Ռուսաստանի նկատմամբ պատժամիջոցների քաղաքականությանը: Զելենսկին հույս է հայտնել, որ այս ոլորտում ՆԱՏՕ-ի դաշնակիցների հետ սերտ համագործակցությունը կշարունակվի:
