Իսրայելը Հարավային Սուդանի հետ բանակցություններ է վարում՝ Գազայի հատվածից պատերազմից տուժած Արևելյան Աֆրիկայի այդ երկիր պաղեստինցիներին վերաբնակեցնելու հնարավորության վերաբերյալ, հաղորդում է Associated Press-ը։
Այս հարցին ծանոթ վեց անձինք Associated Press-ին հաստատել են բանակցությունների փաստը։
Լրատվամիջոցների տվյալներով՝ պարզ չէ, թե որքանով են առաջընթաց գրանցել բանակցությունները, բայց ծրագրերը կյանքի կոչվելու դեպքում, դրանք կհանգեցնեն մարդկանց տեղահանմանը պատերազմից տուժած մեկ երկրից մյուսը, ինչը կբարձրացնի մարդու իրավունքներին առնչվող մտահոգությունները։
Իսրայելի վարչապետ Բենիամին Նեթանյահուն հայտարարել է, որ ցանկանում է իրականացնել ԱՄՆ նախագահ Դոնալդ Թրամփի՝ Գազայի բնակչության մեծ մասի վերաբնակեցման գաղափարը՝ Նեթանյահուն անվանում է «կամավոր միգրացիա»։ Իսրայելը նմանատիպ վերաբնակեցման առաջարկներ է արել նաև այլ աֆրիկյան երկրների։
Պաղեստինցիները, մարդու իրավունքների պաշտպանությամբ զբաղվող խմբերը և միջազգային հանրության մեծ մասը մերժել են առաջարկները՝ որպես միջազգային իրավունքի խախտումով բռնի վտարման ծրագիր։
Հարավային Սուդանի համար նման գործարքը կարող է օգնել ավելի սերտ կապեր հաստատել Իսրայելի հետ, որն այժմ Մերձավոր Արևելքի գործնականում անվիճելի ռազմական ուժ է։ Դա նաև Թրամփի համար հնարավոր հաղթանակ է, որը փետրվարին առաջ քաշեց Գազայի վերաբնակեցման գաղափարը, սակայն վերջին ամիսներին, կարծես, հրաժարվել է այդ մտքից։
Իսրայելի ԱԳՆ-ն հրաժարվել է մեկնաբանություն տալ, մինչդեռ Հարավային Սուդանի արտգործնախարարը չի պատասխանել բանակցությունների վերաբերյալ հարցերին։ Ըստ Associated Press-ի՝ Պետքարտուղարության խոսնակը հայտարարել է, որ ինքը չի մեկնաբանում մասնավոր դիվանագիտական զրույցները։
