ԱՄՆ Սիեթլ քաղաքում կողոպտիչները հափշտակել են մոտ 2 միլիոն դոլար արժողությամբ ադամանդներ, շքեղ ժամացույցներ, ոսկի և այլ իրեր՝ կեսօրին ոսկերչական խանութի հանդուգն կողոպուտի հետևանքով, որը տևել է ընդամենը մոտ 90 վայրկյան, հաղորդում է Associated Press-ը։
Արևմտյան Սիեթլում գտնվող խանութի տեսահսկման խցիկների տեսագրության մեջ երևում է, թե ինչպես են դիմակավորված չորս կասկածյալները հինգշաբթի օրը մուրճերով կոտրում փակ մուտքի ապակե դուռը, ապա թալանում վեց ցուցափեղկ։
Ոստիկանության հայտարարության մեջ ասվում է, որ ցուցափեղկերից մեկում ցուցադրված են եղել մոտ 750 000 դոլար արժողությամբ Rolex ժամացույցներ, իսկ մյուսում՝ 125 000 դոլար արժողությամբ զմրուխտե մանյակ։
Ըստ ոստիկանության հայտարարության, դիմակավորված կասկածյալը միջատների դեմ ցողացիրով և էլեկտրաշոկերով սպառնացել է աշխատակիցներին, սակայն ոչ ոք չի տուժել։
«Մենք՝ որպես աշխատակիցներ, ցնցված ենք, — ասել է ընտանեկան խանութի փոխնախագահ Ջոշ Մենաշեն։ — Որոշ ժամանակ մեր խանութը փակ կլինի»։
Մենաշեն պատմել է, որ աշխատակիցներն ավարտել են կոտրված ապակիների մաքրումը և աշխատում են կորուստների ամբողջական գույքագրման ուղղությամբ։
Ոստիկանությունը հայտնել է, որ արձագանքել է կողոպուտին, սակայն կասկածյալներն արդեն հասցրել էին մեքենայով հեռանալ և թաքնվել որոնումներից։
