Օգտագործելով գերհամակարգիչների հզորությունը՝ գիտնականները սովորել են կանխատեսել, թե ինչպես կզարգանա երկրաշարժը և ինչ վնաս կարող է այն պատճառել: Նախագիծը ղեկավարում է ավագ գիտնական Դեյվիդ ՄըքՔալենը՝ Լոուրենս Բերկլիի և Օուք Ռիջի ազգային լաբորատորիաների թիմերի հետ համատեղ: Նրանք ստեղծում են երկրաշարժերի ամենաժամանակակից մոդելավորումները, որոնք արդեն բացահայտել են նոր մանրամասներ, թե ինչպես են երկրաբանական պայմաններն ազդում ցնցումների ուժգնության և շենքերի կայունության վրա, գրում է Interesting Engineering-ը:
Հետազոտողների հիմնական նպատակն է մոդելավորել երկրաշարժը սկզբից մինչև վերջ՝ հետևելով երկրի միջով սեյսմիկ ալիքների ուղուն: Գիտնականները ցանկանում են հասկանալ, թե ինչպես են դրանք փոխազդում շենքերի և կարևորագույն էներգետիկ ենթակառուցվածքների հետ՝ նախապես գնահատելու համար դրա խոցելիությունը: Անցյալում նման հետազոտությունները սահմանափակվում էին կոպիտ մոդելներով՝ հաշվողական հզորության անբավարարության պատճառով:
Exascale Computing նախագծի ի հայտ գալով և EQSIM կոդի ստեղծմամբ իրավիճակը փոխվել է: EQSIM-ը ցույց է տալիս, թե ինչպես են ալիքները փոխազդում հողի, լեռների և հովիտների հետ՝ ուժեղացնելով կամ մեղմացնելով երկրաշարժի էներգիան, ինչպես նաև օգնել կանխատեսելու ջրային և էներգետիկ համակարգերի վարքագիծը։
Ուաշգրավ է, որ փոքր երկրաշարժերը երբեմն կարող են ավելի մեծ վնաս պատճառել, քան խոշորները։ Ամեն ինչ կախված է բեկվածքի տեսակից, գետնի կազմից և մակերևույթի կազմությունից։ Դա հասկանալու համար թիմը մոդելավորում է ակտիվությունը Միացյալ Նահանգների երեք հիմնական երկրաշարժային գոտիներում՝ Սան Ֆրանցիսկոյի ծոցի տարածքում, Լոս Անջելեսում և Նյու Մադրիդի շրջանում։
Սիմուլյացիաները կատարվում են աշխարհի ամենահզոր՝ Թենեսիի Frontier գերհամակարգչի վրա։ Այն աշխատում է վայրկյանում երկու էկզաֆլոպով և անհավանական ճշգրտությամբ կարող է մշակել մինչև 500 միլիարդ կետ՝ վերարտադրելով երկրաբանությունը և ենթակառուցվածքները։ Յուրաքանչյուր սիմուլյացիա տևում է 90 րոպե իրական ժամանակում և մոտ 3 պետաբայթ տվյալներ է ստեղծում։
Ըստ ՄըքՔալենի՝ մեթոդի հիմնական առավելությունն այն է, որ գիտնականներն այլևս ստիպված չեն սպասել «Մեծ երկրաշարժին»՝ դրա հետևանքները հասկանալու համար։ Այսօր նրանք կարող են նախապես տեսնել, թե որտեղ կկենտրոնանա ցնցումների էներգիան և որ շենքերը կհայտնվեն վտանգի տակ։
