Ռուսաստանի արտաքին գործերի նախարար Սերգեյ Լավրովը բացատրել է, որ Ալյասկայում ռուս-ամերիկյան գագաթնաժողովի ժամանակ «СССР» (ԽՍՀՄ) գրությամբ սվիտերով իր հայտնվելը չի վկայում Խորհրդային Միությունը վերականգնելու ցանկության մասին։
«Ո՛չ», — ասել է նա ամերիկյան NBC News հեռուստաալիքին տված հարցազրույցում՝ պատասխանելով այս մասին հարցին։ «Մենք ծնվել ենք Խորհրդային Միությունում։ Ռուսաստանի նախագահ Վլադիմիր Պուտինը բազմիցս ասել է, որ նրանք, ովքեր չեն զղջում ԽՍՀՄ-ի փլուզման համար, սիրտ չունեն։ Բայց նրանք, ովքեր ցանկանում են վերականգնել այն, գլուխ չունեն։ Սա բացարձակապես ճիշտ պնդում է»։
Լավրովը նշել է, որ Ռուսաստանը ճանաչել է բոլոր նախկին խորհրդային հանրապետությունները որպես անկախ պետություններ։ «Մենք նրանց հետ հարաբերություններ ենք զարգացնում ինչպես լիովին անկախ պետությունների հետ։ Բայց երբ Ուկրաինայի նման երկրները սկսում են ֆիզիկապես և իրավաբանորեն ոչնչացնել ռուսական ամեն ինչը… Պատկերացրեք, որ որևէ այլ երկրում արգելեն անգլերեն լեզուն, ամերիկյան պատմությունը», — նշել է նախարարը։
«Ինչ վերաբերում է ԽՍՀՄ-ին, եթե դուք չեք հիշում ձեր արմատները, եթե չունեք մանկության, պատանեկության, առաջին սիրո, ընկերների մասին նոստալգիկ հիշողություններ, ապա դժվար թե կարողանաք իսկապես ներկայացնել մարդկությունն ու մարդկային արժեքները», — ընդգծել է Ռուսաստանի արտաքին գործերի նախարարության ղեկավարը: «Մի բան է հիշել և գնահատել այն, ինչ տեղի է ունեցել ձեր կյանքում տարիների ընթացքում, բայց բոլորովին այլ բան է փորձել ռազմական ճանապարհով գրավել ձեր շուրջը ամեն ինչ: Դա նույնը չէ»:
