Լիբանանի կառավարությունը հինգշաբթի հաստատել է ամերիկացի միլիարդատեր Իլոն Մասկի Starlink-ի լիցենզիան՝ ամբողջ երկրում ինտերնետ ապահովելու համար, , հայտնել է Reuters գործակալությանը։
Հեռահաղորդակցության նախարար Չարլզ Հեյջի խոսնակ Թոնի Սաադը հայտարարել է, որ Starlink-ը Լիբանանում ստեղծել է ընկերություն, որը կառավարության հետ մոտ վեց ամիս տևած բանակցություններից հետո ստացել է արտոնագիրը։
Նա նշել է, որ ծառայությանը հասանելիությունը կսահմանափակվի ամսական 100 դոլարից սկսվող փաթեթներ մատակարարող ընկերություններով։ Բանակցությունները սկսվել են այս տարվա սկզբին, երբ Լիբանանի նախագահ Ջոզեֆ Աունը հանդիպել էր Starlink-ի լիցենզավորման և զարգացման գլոբալ տնօրեն Սեմ Թըրների հետ և տեղեկացրել ընկերության՝ Լիբանանի հեռահաղորդակցության նախարարության հետ բանակցությունների մասին։
Այդ ժամանակ Լիբանանի նախագահը հայտարարել էր, որ Թըրները ներկայացրել է «Starlink-ի ամենաակնառու առավելությունները արբանյակային ինտերնետային ծառայությունների ընդլայնման գործում, որոնք դրական ազդեցություն կունենան արդյունաբերական, առևտրային, բանկային և կրթական հաստատությունների, ինչպես նաև պետական գերատեսչությունների և հաստատությունների վրա»։
Հանդիպումից հետո Աունը Մասկին հրավիրել է Բեյրութ՝ երկուսի միջև տեղի ունեցած հեռախոսազրույցի ժամանակ։ Մասկը նշել է, որ Լիբանանի հեռահաղորդակցության և ինտերնետի ոլորտների նկատմամբ հետաքրքրություն ցուցաբերելուց հետո հնարավորինս շուտ կքննարկի այցելության հնարավորությունը։
Աունի գրասենյակից հայտնել են, որ նախագահը ողջունել է գաղափարը և վերահաստատել Լիբանանի պատրաստակամությունը՝ անհրաժեշտ օգնություն ցուցաբերելու երկրի իրավական և կարգավորող շրջանակում։
Լիբանանը տարիներով հետ է մնում համացանցի և հեռահաղորդակցության ծառայությունների ոլորտում և բջջային տվյալների փաթեթների առումով ամենաթանկ երկրներից մեկն է։
