Սահմանների բացումը բազմաթիվ հնարավորություններ կստեղծի Հայաստանի համար, սեպտեմբերի 24-ին լրագրողների հետ զրույցում հայտարարել է ՀՀ էկոնոմիկայի նախարար Գևորգ Պապոյանը։
Նա տեղեկացրել է, որ վերջերս հրապարակվել է իր գիտական հոդվածը, ըստ որի նմանության ինդեքսով մի կողմից Հայաստանի, մյուս կողմից Ադրբեջանի և Թուրքիայի կողմից արտահանվող ապրանքները նման չեն: Պապոյանը վստահեցրել է, որ այդ առումով խնդիրներ չկան։
Նախարարը հավելել է, որ ապրանքների փոխլրացման ինդեքսն ավելի մեծ նմանություններ է ցույց տալիս։ «Սա ենթադրում է, որ մենք ներմուծում ենք այն ապրանքները, որոնք նրանք են արտահանում, իսկ նրանք ներմուծում են այն ապրանքները, որոնք արտահանում է Հայաստանը», — նշել է նախարարը։
Պապոյանը հայտարարել է երկրորդ հոդվածի հրապարակման մասին՝ նվիրված Հայաստանի և Թուրքիայի միջև սահմանի բացման կոնկրետ ազդեցությանը։
