ՀԱՄԱՍ-ի հետ համաձայնագրի վերաբերյալ Իսրայելի կաբինետի քվեարկությունն արդեն մի քանի ժամով հետաձգվում է։
Ըստ BBC-ի՝ ժամեր տևող հետաձգումը պայմանավորված է Իսրայելի ծայրահեղ աջակողմյան ներքին անվտանգության նախարար Իտամար Բեն-Գվիրի պահանջով. վերջինս պահանջել էր վետո դնել ահաբեկչության մեջ մեղադրվող պաղեստինցի բանտարկյալների ազատ արձակման վրա։
Կառավության նիստից առաջ հայտնի է դարձել, որ գործարքի շրջանակում Իսրայելը պարտավորվում է ազատ արձակել ցմահ բանտարկության դատապարտված 250 բանտարկյալների։
Բեն-Գվիրը հայտարարել է, որ չի կարող քվեարկել «այդ արյունարբու ահաբեկիչներին ազատ արձակելու համաձայնագրի օգտին»։
Կառավության մեկ այլ ծայրահեղ աջակողմյան անդամ՝ ֆինանսների նախարար Բեցալել Սմոտրիչը, համամիտ է այդ կարծիքին և նախապես հայտարարել է, որ դեմ կքվեարկի համաձայնագրին։
Իտամար Բեն-Գվիրը սպառնացել է լքել կառավարությունը և իր «Օցմա Եհուդիտ» կուսակցությունը դուրս բերել իշխող կոալիցիայից, եթե ՀԱՄԱՍ-ը «շարունակի գոյություն ունենալ» պատանդների ազատ արձակումից հետո։ Նա նշել է, որ վարչապետ Նեթանյահուն վստահեցրել է իրեն, որ դա տեղի չի ունենա, սակայն ինքն այնքան էլ վստահ չէ դրանում։
«Եթե ՀԱՄԱՍ-ի կառավարությունը չտապալվի, կամ եթե մեզ պարզապես ասեն, որ այն տապալվել է, բայց իրականում այն շարունակի գոյություն ունենալ այլ տեսքով, Օ«ցմա Եհուդիտը կտապալի կառավարությունը»,- հայտարարել է Բեն-Գվիրը։
Եթե Բեն-Գվիրը և Սմոտրիչը լքեն ներկայիս կառավարությունը, Նեթանյահուին կմնա Քնեսեթի 120 տեղերից միայն 47-ը, մինչդեռ բացարձակ մեծամասնության համար անհրաժեշտ է 61 տեղ։
