Գործակալների և հանրության միջև բախումներից մտահոգված, դատավորը հինգշաբթի Չիկագոյի տարածքում գործող ներգաղթի դաշնային ծառայության գործակալներին հրամայել է մարմնին տեսագրանցիչներ կրել, ինչպես նաև կանչել բարձրաստիճան պաշտոնյայի՝ հաջորդ շաբաթ դատարան ներկայանալու՝ քննարկելու համար իրավապահ գործողությունը, որի արդյունքում ավելի քան 1000 մարդ է ձերբակալվել, հաղորդում է Associated Press-ը։
ԱՄՆ շրջանային դատավոր Սառա Էլիսը նշել է, որ «փոքր-ինչ ցնցված է»՝ հեռուստատեսությամբ տեսնելով փողոցային բախումների կադրեր, որոնք ներառում էին արցունքաբեր գազ և այլ մարտավարական հնարքներ նախագահ Դոնալդ Թրամփի վարչակազմի նախաձեռնած՝ երկրի երրորդ խոշորագույն քաղաքում ներգաղթի դեմ պայքարի ընթացքում։
Չիկագոյում ակտիվացել են ԱՄՆ ներգաղթի և մաքսային ծառայության դեմ պայքարի համայնքային ջանքերը, որտեղ տեղական խմբերը հավաքվել են՝ վերահսկելու ICE-ի գործունեությունը և նկարահանելու գործակալների մասնակցությամբ միջադեպերը։ Սեպտեմբերից ի վեր ձերբակալվել է ավելի քան 1000 ներգաղթյալ։
Չիկագոյի արվարձան Բրոդվյույում գտնվող ներգաղթի և մաքսային ծառայության շենքը դարձել է կանոնավոր բողոքի ցույցերի վայր։ Թրամփի վարչակազմը միաժամանակ փորձել է Ազգային գվարդիայի զորքեր տեղակայել, սակայն այդ ռազմավարությունը անցյալ շաբաթ կասեցրել է մեկ այլ դատավոր։
Անցյալ շաբաթ Էլիսը հրամայել է տարածքում գործող գործակալներին կրել կրծքանշաններ և արգելել նրանց խաղաղ ցուցարարների և լրագրողների դեմ անկարգությունների դեմ պայքարի որոշակի մեթոդների օգտագործումը։
Նա նշել է, որ տեղական իրավապահ մարմինների ղեկավարը երկուշաբթի պետք է դատարան ներկայանա։ Նահանգապետ Ջեյ Բի Փրիցքերը գովաբանել է դատավորների որոշումը՝ շեշտելով, որ ձերբակալությունների և այլ միջադեպերի, ներառյալ՝ վերջին ամիսներին Չիկագոյի արվարձանում տեղի ունեցած մահացու կրակոցների մասին կառավարության հայտարարությունները, շատ դեպքրում ճշգրիտ չէին։
2024 թվականին ներգաղթի և մաքսային ծառայությունն իրավապահ մարմինների և արտաքսման գործողությունների համար պատասխանատու սպաների համար սկսեց մոտ 1600 մարմնի տեսագրանցիչներ տեղադրել։
Այդ ժամանակ պաշտոնյաները հայտարարել են, որ դրանք կտրամադրվեն Բալթիմորի, Ֆիլադելֆիայի, Վաշինգտոնի, Բուֆֆալոյի, Նյու Յորքի և Դետրոյթի գործակալներին։ Ներքին անվտանգության դեպարտամենտի այլ գերատեսչություններ պահանջում են, որ որոշ գործակալներ տեսագրանցիչներ կրեն։ ԱՄՆ մաքսային և սահմանային պաշտպանության ծառայությունը հրապարակեց իր գործակալների կամ սպաների կողմից ուժ կիրառելու տեսագրությունները։
