Թբիլիսիի քաղաքային դատարանը Անդրիա Լիլուաշվիլու՝ Վրաստանի պետական անվտանգության ծառայության (ՊԱԾ) նախկին ղեկավար Գրիգոլ Լիլուաշվիլու զարմիկի համար խափանման միջոց է ընտրել կալանքը, նա մեղադրվում է փողերի լվացման մեջ, տեղեկացրել է «Новости-Грузия»-ն։
Նիստը տեղի է ունեցել դռնփակ։ Դատախազությունը միջնորդություն է ներկայացրել՝ վկայակոչելով գործում զգայուն նյութերի առկայությունը։ Փաստաբանները եւ մեղադրյալը կտրականապես դեմ են եղել դրան եւ պնդել են հրապարակային լսումներ անցկացնելու անհրաժեշտության մասին։
Պաշտպանությունը խնդրել է, որ Լիլուաշվիլին ազատ արձակվի 300 հազար լարի գրավի դիմաց՝ մինչեւ դատավարության ավարտը։ Դատարանը մերժել է միջնորդությունը։
Անդրիա Լիլուաշվիլին հերքում է մեղադրանքները։
ՊԱԾ նախկին ղեկավարի զարմիկը ձերբակալվել է հոկտեմբերի 23-ին։ Նրան մեղադրանք է առաջադրվել Վրաստանի քրեական օրենսգրքի 194-րդ հոդվածով՝ առանձնապես խոշոր չափերի անօրինական եկամուտների լեգալացում։ Այս հանցագործությունը պատժվում է 9-12 տարի ազատազրկմամբ։
Լրատվամիջոցների տվյալներով՝ Անդրիա Լիլուաշվիլին լոգիստիկայի ոլորտում գործող մի քանի ընկերությունների սեփականատեր է։ Մեղադրական եզրակացության մեջ նա հիշատակվում է որպես «Գրիգոլ Լիլուաշվիլու հետ կապված անձ»։
Հոկտեմբերի 22-ին դատախազությունը հայտնել էր Լիլուաշվիլու հետ կապված մեկ այլ անձի՝ «Վրացական երկաթուղու» նախկին մենեջեր Կոբա Խունդաձեի ձերբակալության մասին։ Քննության տվյալներով՝ Խունդաձեի տանը հայտնաբերվել է 1,3 միլիոն դոլար, որը բաժանված էր 94 ծրարների մեջ։ Նա նույնպես մեղադրվում է փողերի լվացման մեջ։
Քննիչները ստուգում են, թե արդյոք Լիլուաշվիլին հանցավոր կապեր է ունեցել ձերբակալվածների հետ։ Առանձին վարույթ է սկսվել Վրաստանի քրեական օրենսգրքի 339-1 հոդվածի՝ «ազդեցության առեւտուր» հոդվածի համաձայն։
Այս փուլում պարզ չէ, թե արդյոք Պետական անվտանգության ծառայության նախկին ղեկավարը հարցաքննվել է։ Հայտնի չէ նաեւ, թե արդյոք նա ներկայում գտնվում է երկրի տարածքում։
Հոկտեմբերի 18-ին Պետական անվտանգության ծառայությունը հայտնել է Լիլուաշվիլու, նախկին վարչապետ Իրակլի Ղարիբաշվիլու, նախկին գլխավոր դատախազ Օթար Պարցխալաձեի եւ նրանց հետ կապված անձանց տներում խուզարկությունների շարքի մասին։ Օպերատիվ աշխատողներն առգրավել են ավելի քան 7 միլիոն դոլար կանխիկ, ոսկե ձուլակտորներ, թանկարժեք զարդեր եւ ժամացույցներ, արվեստի գործեր, փաստաթղթերի հազարավոր էջեր եւ էլեկտրոնային կրիչներ։
Հոկտեմբերի 22-ին Ղարիբաշվիլին խոստովանել է, որ կառավարությունում աշխատելիս ապօրինի եկամուտներ է ստացել։ Նրան փողերի լվացման մեղադրանք է առաջադրվել, սակայն դատախազության պահանջով դատարանը նրան ազատ է արձակել 1 միլիոն լարի գրավի դիմաց։
Սա իշխող վերնախավի բարձրաստիճան անդամի նկատմամբ առաջին դատական հետապնդումն է «Վրացական երազանքի» 13 տարվա իշխանության ընթացքում։
