Գերմանիայի ներքին գործերի նախարար Ալեքսանդր Դոբրինդտը հայտարարել է, որ նախատեսվում է ընդլայնել անվտանգության մարմինների լիազորությունները՝ երկրի պաշտպանությունը կիբերհարձակումներից ապահովելու համար, հաղորդում է Handelsblatt-ը։
Ըստ նախարարի, պատրաստվում է օրինագիծ, որը կթույլատրի ապագայում պատասխան գործողություններ իրականացնել կիբերհարձակումների աղբյուրների դեմ, նույնիսկ եթե դրանց սերվերները գտնվում են Գերմանիայից դուրս։
Դոբրինդտը շեշտել է, որ խոսքը «հակահարձակման» մասին չէ ագրեսիվ իմաստով, այլ՝ պաշտպանական միջոցների։ Այսինքն՝ գերմանական ծառայությունները կկարողանան արգելափակել արտասահմանում գտնվող հարձակվողների ենթակառուցվածքն ու թվային համակարգերը, եթե պարզվի, որ դրանք ծրագրում կամ արդեն իրականացնում են հարձակում գերմանական օբյեկտների վրա։
Նախարարը նշել է, որ նման միջոցներ կիրառելու համար Սահմանադրության փոփոխություն անհրաժեշտ չէ, քանի որ համապատասխան իրավական մեխանիզմներն արդեն առկա են, և դաշնային մարմինները կկարողանան գործել նաև երկրամասերի իշխանությունների հետ համատեղ։
Օրինագիծը կառավարությանն է ներկայացվելու հաջորդ տարի։ Դոբրինդտը հավելել է, որ նախաձեռնության նպատակը Գերմանիային «ակտիվ պաշտպանվելու, այլ ոչ թե հետադարձ արձագանքելու» հնարավորություն տալն է։
