«Այս տարվա հունվարից մինչև սեպտեմբեր Ռուսաստանի հում նավթի արտահանման 86%-ը, ներառյալ խողովակաշարային մատակարարումները, ուղղվել է Չինաստան և Հնդկաստան։ Եթե Մոսկվան կորցնի այս շուկաներին մուտքը, այն կարող է ամսական մոտ 7,4 միլիարդ դոլար եկամուտ կորցնել, ինչը ամսական մոտ 3,6 միլիարդ դոլար հարկային եկամուտ է կազմում»,- ըստ The Guardian պարբերականի՝ նշել է Էներգետիկայի և մաքուր օդի հետազոտությունների կենտրոնի (Crea) վերլուծաբան Լյուկ Ուիկքենդենը։
Միացյալ Նահանգները հոկտեմբերի 22-ին «Роснефть»-ի և «Лукойл»-ի նկատմամբ պատժամիջոցներ սահմանելուց հետո հայտնվեցին հաղորդագրություններ, որ չինական պետական ընկերությունները դադարեցրել են Ռուսաստանից նավթի գնումները, իսկ հնդկական վերամշակման գործարանները պատրաստվում են կտրուկ կրճատել ներմուծումը։ «ԱՄՆ-ն 24 ժամվա ընթացքում ավելի արդյունավետ գործեց, քան Եվրամիությունը՝ վերջին վեց ամիսների ընթացքում», — պարբերականին տված հարցազրույցում ասել է Մեծ Բրիտանիայի Թագավորական պաշտպանական հետազոտությունների միավորված ինստիտուտի (Royal United Services Institute, RUSI) փորձագետ Թոմ Քիթինգը։
Սեպտեմբերին Հնդկաստանի պետական նավթավերամշակման գործարանների կողմից ռուսական հում նավթի ներմուծումը նվազել է մինչև 2022 թվականի մայիսից ի վեր ամենացածր մակարդակը՝ նախորդ ամսվա համեմատ 38%-ով պակաս, գրում է The Guardian-ը։ Ռուսաստանի ամսական եկամուտը բրածո վառելիքի արտահանումից անցյալ ամիս նվազել է 4%-ով՝ հասնելով լիամասշտաբ ներխուժումից ի վեր ամենացածր մակարդակին, և այժմ կազմում է 2022 թվականի սեպտեմբերի մակարդակի կեսը, գրում է DW-ն։
