ԱՄՆ Գերագույն դատարանը պաշտպանել է Դոնալդ Թրամփի վարչակազմի որոշումը, ըստ որի ամերիկյան անձնագրերում կլինեն միայն երկու սեռի տարբերակ՝ արական և իգական: Որոշումը նշանակում է, որ տրանս և ոչ բինար անձինք «X» կամ ծննդյան ժամանակ տրվածից բացի որևէ այլ սեռի նշում այլևս չեն կարողանա նշել:
Վեց ձայների առավելությամբ դատարանը որոշել է, որ «ի ծնե» սեռի նշումը չի խախտում հավասարության սկզբունքը, հաղորդում է Bild-ը:
«Անձնագրում սեռի գրանցումը խտրականության դրսևորում չէ. դա նույնքան պատմական փաստ է, որքան ծննդվայրը»,- նշված է որոշման մեջ:
Լիբերալ դատավորները հակադարձել են, որ նոր քաղաքականությունը տրանս անհատներին բռնության և նվաստացման վտանգի է ենթարկում: Դիմողների բողոքներում նշվում է, որ նրանք հաճախ մեղադրվել են փաստաթղթերի կեղծման մեջ կամ օդանավակայաններում նվաստացուցիչ խուզարկությունների են ենթարկվել: Չնայած դրան, Գերագույն դատարանի պահպանողական մեծամասնությունը պաշտպանել է Սպիտակ տան դիրքորոշումը:
Սա առայժմ ժամանակավոր որոշում է. գործով վերջնական վճիռը դեռևս սպասվում է: Սակայն, իրավաբանները կարծում են, որ սա նշանակում է Միացյալ Նահանգներում վերադարձ Թրամփի խիստ գենդերային քաղաքականությանը: Համեմատության համար նշենք, որ Գերմանիան և մի քանի ԵՄ երկրներ դեռևս թույլ են տալիս անհատներին փաստաթղթերում նշել «divers» կամ «X», իսկ սեռի վերանշանակման գործընթացը պարզեցվել է ինքնորոշման մասին օրենքով:
