Դատապարտված սեռական հանցագործ Ջեֆրի Էփշտեյնի հետ իր կապերի վերաբերյալ երկկուսակցական քննադատության ենթարկված ԱՄՆ առևտրի նախարար Հովարդ Լութնիկը երեքշաբթի հայտարարել է, որ ինքը Էփշտեյնի հետ որևէ անձնական հարաբերություն չի ունեցել։
Միաժամանակ Լութնիկը խոստովանել է, որ 2012 թվականին ընտանեկան արձակուրդի ժամանակ այցելել է հանգուցյալ սեռական հանցագործի մասնավոր կղզի։
«Ես նրա հետ որևէ հարաբերություն չեմ ունեցել։ Ես գրեթե ոչ մի ընդհանուր բան չունեի այդ անձի հետ, պա՞րզ է»,- Սենատի հատկացումների հարցերով ենթահանձնաժողովում լայնաշերտ կապի ֆինանսավորման վերաբերյալ լսումների ժամանակ ասել է Լութնիկը։
Լութնիկի և Էփշտեյնի հարաբերությունները վերջին օրերին քննադատության են ենթարկվել, քանի որ նրա անունը հայտնվել է Արդարադատության նախարարության վերջերս հրապարակած Էփշտեյնի վերաբերյալ մի քանի դոսյեներում։ Մինչ օրս Սպիտակ տունը աջակցել է նրան։
Հոկտեմբերին Լաթնիկն իր կապերը որակել է որպես սահմանափակ, սակայն վերջերս հրապարակված փաստաթղթերի լույսի ներքո նա այժմ բախվում է կաբինետի քարտուղարի պաշտոնից հրաժարական տալու կոչերի՝ հիմնականում դեմոկրատների կողմից։
Մերիլենդ նահանգի դեմոկրատ սենատոր, ենթահանձնաժողովի բարձրաստիճան անդամ Քրիս Վան Հոլենն իր բացման խոսքում հստակեցրել է, որ ցանկանում է օգտագործել լսումները՝ Լաթնիկին Էփշտեյնի մասին հարցեր տալու համար: Լութնիկը Էպշտեյնին առնչություն ունեցող որևէ հանցանքի մեջ չի մեղադրվել, սակայն քննադատվել է նրանց փոխազդեցությունների վերաբերյալ ավելի թափանցիկ չլինելու համար։
«Խնդիրն այն չէ, որ դուք որևէ հանցանք եք գործել Ջեֆրի Էփշտեյնին առնչությամբ, այլ այն, որ դուք լիովին սխալ եք ներկայացրել նրա հետ ձեր հարաբերությունների ծավալը Կոնգրեսին, ամերիկյան ժողովրդին և նրա նողկալի, հանցավոր և գիշատիչ գործողություններից հետո ողջ մնացածներին»,- երեքշաբթի հայտարարել է Վան Հոլենը: «Գրառումները ցույց են տալիս, որ դուք շփվել եք Էփշտեյնի հետ հետագա 13 տարիների ընթացքում, ներառյալ՝ 2008 թվականին անչափահասներին մարմնավաճառության ներգարվելու համար դատապարտվելուց շատ ժամանակ անց»։
Լութնիկը հաստատել է, որ Էփշտեյնի հետ ծանոթացել է, երբ վերջինս տեղափոխվել է Նյու Յորքի հարևան տուն։
«Այդ ժամանակ էլ ծանոթացա նրա հետ,- ասել է Լութնիկն օրենսդիրներին: -Հետագա14 տարիների ընթացքում ես նրան հանդիպել եմ ևս երկու անգամ, որքան հիշում եմ՝ երկու անգամ»։
Երբ Լութնիկին հարցրել են՝ արդյոք նա 2012 թվականին այցելե՞լ է Կարիբյան ծովում Էփշտեյնի մասնավոր կղզին, նա պատասխանել է, որ այդ դեկտեմբերին ընտանեկան արձակուրդի ժամանակ ճաշել է Էփշտեյնի հետ նրա կղզում։
«Իմ կինը, չորս երեխաները և դայակները ինձ հետ էին։ Ինձ հետ մեկ այլ զույգ կար, նրանք այնտեղ էին իրենց երեխաների հետ, և մենք մեկ ժամ ճաշեցինք կղզում, դա ճիշտ է»,- ասել է նա։
Լութնիկը նշել է, որ շփման մեջ «պարսավելի» ոչինչ չկար։
