ԱՄՆ Թեքսաս նահանգում դատարանը 53-ամյա Սյուզան Ռեյ Հելթոնին մեղավոր է ճանաչել երեխաների նկատմամբ դաժան վերաբերմունքի մեջ, երբ պարզվել է, որ նա ամիսներ շարունակ դեռահասներին պահել է ինքնաշեն վանդակներում, ծեծել նրանց և համակարգված կերպով զրկել նրանց սննդից։
Քննությունը որպես տուժածներ ճանաչել է 14-ամյա աղջկա և 13-ամյա տղայի։ Հետաքննության տվյալներով՝ կինն օգտագործել է վանդակների վերածված մանկական կոնստրուկցիաները, որտեղ նա որպես պատիժ տեղավորել է դեռահասներին՝ երբեմն մինչև երկու կամ երեք շաբաթ ժամկետով։ Դրա մասին հայտնել է Mirror պարբերականը։
Քննությունը սկսվել է երեխաների պաշտպանության ծառայություններին ստացված ահազանգից հետո։
Ոստիկանությունը և սոցիալական աշխատողները ժամանել են մեղադրյալի տուն և երեխաներին մեկուսացնելու համար նախատեսված կառույցներ են հայտնաբերել։ Տուժածները հայտնել են, որ իրենց ծեծում էին գոտիներով և պատժում սովատանջությամբ, հատկապես, եթե փորձում էին խոհանոցից սնունդ վերցնել։
Ինքը՝ կինն պնդել է, թե սահմանափակել է նրանց սնունդը՝ «սննդի գողությունը» կանխելու համար, սակայն բժշկական զննումը դեռահասների մոտ ծանր թերսնում է բացահայտել։ Ընտանիքի հետ ապրած հինգ տարիների ընթացքում նրանց քաշն ավելացել է ընդամենը մի քանի կիլոգրամով։
Բոլոր ութ խնամատար երեխաները տնային կրթություն են ստացել, և ինչպես պարզել է հետաքննությունը, կինը գործնականում չի դիմել բժշկական օգնության։ Մյուս երեխաները հաստատել են տուժածների ցուցմունքները՝ հայտնելով, որ այդ երկու երեխաներն ամենահաճախն են ենթարկվել պատժի։
Կոմալ շրջանի դատարանը Հելթոնին մեղավոր է ճանաչել երեխային լուրջ վնաս հասցնելու չորս դրվագով։ Նա յուրաքանչյուր դրվագով դատապարտվել է 20-ական տարվա ազատազրկման։
