Ուկրաինայի նախագահ Վլադիմիր Զելենսկին իր թելեգրամյան ալիքում պատմել է Երևանում Եվրոպական քաղաքական համայնքի գագաթնաժողովի շրջանակում Հայաստանի վարչապետ Նիկոլ Փաշինյանի հետ ունեցած հանդիպման տպավորությունների մասին:
«Լավ հանդիպում Հայաստանի վարչապետ Նիկոլ Փաշինյանի հետ: Շնորհակալ եմ Եվրոպական քաղաքական համայնքի գագաթնաժողովին հրավիրելու համար: Սա Ուկրաինայի նախագահի առաջին այցն է Հայաստան վերջին 24 տարվա ընթացքում: Կարևոր է, որ մենք վերսկսում ենք ակտիվ երկխոսությունը մեր երկրների միջև:
Քննարկել ենք իրավիճակը տարածաշրջանում, ինչպես նաև անվտանգության ոլորտի մարտահրավերներն ու սպառնալիքները: Ես տեղեկացրել եմ իրական խաղաղության հասնելու ուղղությամբ տարվող դիվանագիտական աշխատանքի մասին:
Խոսել ենք նաև տնտեսական գործընկերության զարգացման մասին: Ես առաջարկեցի վերսկսել Տնտեսական համագործակցության հարցերով համատեղ միջկառավարական հանձնաժողովի աշխատանքը և դրա հաջորդ նիստն անցկացնել արդեն այս տարի Կիևում»,- գրել է Ուկրաինայի նախագահը:
