ՀՀ Ճանապարհային ոստիկանության ուղեկցող սպայական վաշտի 3-րդ դասակի ավագ տեսուչներ Էդգար Ա.-ն և Արսեն Խ.-ն ապրիլի 12-ին կանգնեցրել են մի մեքենա, որի վարորդը եղել է Զարեհ Սարգսյանը՝ նախկին բարձրաստիճան պաշտոնյա՝ կապերով ինչպես նախկին, այնպես էլ գործող իշխանությունների հետ։ Մեքենան ունեցել է ժամկետանց տրանզիտ համարներ։
Ըստ աղբյուրների, ոստիկանները փորձել են օրենքի սահմաններում արձագանքել խախտմանը, սակայն դեպքը վերածվել է անձնական հաշվեհարդարի։ Զարեհ Սարգսյանը, ում անունը երկար տարիներ կապվել է պետական բյուջեից միլիարդավոր դրամների շահագործման գործերի հետ, օգտագործել է իր իշխանական կապերը և անձեռնմխելիությունը, որպեսզի շրջի իրավիճակը սեփական օգտին։
Նրա անունը հանրային դաշտում վաղուց համարվում է անպատժելիության խորհրդանիշ, ինչին նպաստել է նախագահ Սերժ Սարգսյանի վարչակազմի կողմից տրված լռելի աջակցությունը և քաղաքական հովանավորչությունը։ Զարեհը տարիներ շարունակ եղել է Սերժ Սարգսյանի մտերիմ շրջապատի անդամ, և այդ կապերը նրան հնարավորություն են տվել վեր կանգնել օրենքից։
Ոստիկանների կողմից իրականացված օրինական գործողությունը, փաստացի, արժանացել է դաժան հետևանքների։ Քանի որ կանգնեցրած անձը եղել է «անմատչելի շրջանակից», արդյունքում՝ ոստիկաններից մեկը ենթարկվել է ֆիզիկական հաշվեհարդարի:
Հանրային հարցադրումն այժմ հնչում է պարզ.
Ո՞վ է վերահսկում օրենքի կատարումը, երբ օրենքը խախտում են իշխանական գծով «թույլատրելի» անձինք։
Ոչ Զարեհ Սարգսյանը, ոչ նրա ընտանիքի ներկայացուցիչները, ոչ էլ ոստիկանությունը մինչ այս պահը մեկնաբանություն չեն ներկայացրել։
Լրատվամիջոցները շարունակում են հետևել այս սկանդալին՝ հույսով, որ պետությունը կարձագանքի ոչ թե ըստ անձի, այլ ըստ օրենքի։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
