Անցնող տարվա վերջին լույս է տեսել MediaLab.am-ի «Ցեց» եռալեզու երգիծաթերթը։ Առաջին օրինակը անվճար է եւ նախատեսվում էր բաժանել տրանսպորտում եւ մետրոյի կայարաններում։ «Նամակով դիմել էինք Երեւանի քաղաքապետարան, որ կարողանանք քաղաքային տրանսպորտում տեղադրել հատուկ գրպանիկներ եւ բաժանել քաղաքացիներին, սակայն, ինչպես եւ ենթադրվում էր, քաղաքապետարանը շատ զավեշտալի մի պատասխանով մերժել է մեզ՝ նշելով, որ մեր թերթը վեճի եւ երեւի ծեծուջարդի ու դժգոհությունների պատճառ կարող է դառնալ»,– տեղեկացնում է MediaLab.am-ի ղեկավար, «Ցեց» երգիծաթերթի գլխավոր խմբագիր Մարիաննա Գրիգորյանը ։ Երգիծաթերթը տպագրվում է Գյումրիում՝ամիսը մեկ պարբերականությամբ ։ Այն կարելի է ձեռք բերել «Հայփոստի» կրպակներում։ ««Հայփոստում» ասել են, որ թե բաժանորդագրության, եւ թե բաժանմունքներում թերթի վաճառքը կազմակերպելու հետ խնդիր չունեն»,–ասում է խմբագիրը։
