Բրազիլիայի նախագահ Լուիս Ինասիո Լուլա դա Սիլվան հինգշաբթի հայտարարել է, որ չի ընդունի «գրինգոների» հրամանները՝ ի պատասխան ԱՄՆ նախագահ Դոնալդ Թրամփի նամակի, որը Բրազիլիայի նկատմամբ 50-անոց տոկոս մաքսատուրքեր էր սահմանել, հաղորդում է Reuters-ը։
Անցյալ շաբաթ հրապարակված նամակում Թրամփը մաքսատուրքերը, որոնք պետք է ուժի մեջ մտնեին օգոստոսին, բացատրել է Բրազիլիայի նախկին նախագահ Ժաիր Բոլսոնարոյի նկատմամբ վերաբերմունքով և ամերիկյան ընկերությունների նկատմամբ Բրազիլիայի ենթադրյալ անարդար առևտրային գործելակերպով։
Լուլան և նրա կաբինետի անդամները մերժել են մաքսատուրքերի հիմքում ընկած հիմնավորումը և պահանջել են հարգել Բրազիլիայի ինքնիշխանությունը՝ միաժամանակ կոչ անելով առևտրային բանակցություններ սկսել Միացյալ Նահանգների հետ։
«Ոչ մի գրինգո հրամաններ չի տալու այս նախագահին»,- Գոյաս նահանգում ձախակողմյան ուսանողական ակտիվիստների հավաքին հայտարարել է վառ կարմիր վերնաշապիկով Լուլան։
Բրազիլիայում «գրինգո»-ն օտարերկրացիների համար տարածված եզրույթ է՝ առանց այն նսեմացնող ենթատեքստի, որն ունի Լատինական Ամերիկայի այլ մասերում, պարզաբանում է Reuters-ը։
Նա հավելել է, որ Բրազիլիան կշարունակի կարգավորել և հարկել ամերիկյան տեխնոլոգիական ընկերությունները՝ պնդելով, որ նրանք խոսքի ազատության քողի տակ խթանում են բռնությունը և կեղծ լուրերի տարածումը։
Բրազիլիայի արտգործնախարար Մաուրո Վիեյրան հինգշաբթի CNN Brasil-ին տված հարցազրույցում հայտնել է, որ Լուլան բաց է Թրամփի հետ բանակցությունների համար, չնայած նրանք դեռ չեն հանդիպել։
Բրազիլիան բանակցություններ է վարում ԱՄՆ մաքսատուրքերից տուժած արդյունաբերական խմբերի և ընկերությունների հետ և բանակցությունների ձախողման դեպքում պատրաստվում է հնարավոր պատասխան միջոցառումների։ Լատինական Ամերիկայի ամենախոշոր տնտեսության նախագահի պաշտոնում իր երրորդ անընդմեջ ժամկետն անցկացնող Լուլայի վարկանիշը սկսել է վերականգնվել անցյալ շաբաթ Թրամփի հետ առևտրային վեճից հետո։
