Ըստ ամբողջ աշխարհում ֆինանսական տարբեր ծառայություններ մատուցող շվեյցարական խոշորագույն ֆինանսական հոլդինգ UBS-ի՝ «Գլոբալ հարստություն 2025» զեկույցի՝ 2023-2024 թվականների միջև ընկած ժամանակահատվածում եվրոպական երկրների մեծ մասում մեկ չափահաս մարդու հաշվով բարեկեցությունն աճել է։
Հունգարիան 2023-2024 թվականների միջև գրանցել է մեկ չափահասի հաշվով միջին բարեկեցության ամենաբարձր իրական աճը՝ 18,6%: Աճը հասել է 15% կամ ավելիի նաև որոշ այլ երկրներում, ինչպիսին են Լիտվան (16,9%), Շվեդիան (15,3%), Իտալիան և Լատվիան (երկուսն էլ՝ 15%), գրում է Euronews-ը։
Ըստ զեկույցի՝ ԵՄ անդամ պետություններից, թեկնածու երկրներից, Եվրասիական ազատ առևտրի գոտու անդամներից և Մեծ Բրիտանիայից միայն Թուրքիայում և Բելգիայում է գրանցվել մեկ չափահաս անձի հաշվով միջին բարեկեցության անկում։ Թուրքիան առանձնանում է 20,9% կտրուկ անկմամբ, մինչդեռ Բելգիան գրանցել է ավելի չափավոր՝ 5,6% անկում։
Եվրոպայի հինգ խոշորագույն տնտեսություններից Իտալիայում գրանցվել է մեկ չափահասի հաշվով բարեկեցության ամենաբարձր իրական աճը՝ 15%, մինչդեռ Մեծ Բրիտանիայում՝ ամենացածրը՝ 5,3%: Ֆրանսիան (10,3%), Գերմանիան (9,5%) և Իսպանիան (9%) խմբավորվել են դրանց միջև։
Եվրոպայից դուրս 2024 թվականին զգալի աճ է գրանցվել Հարավային Կորեայում (13,9%), Ավստրալիայում (10,7%), Կանադայում (9,6%) և Ճապոնիայում (8,6%): ԱՄՆ-ում բարեկեցության աճը չափավոր էր՝ 2,3%։
Երբ դիտարկում ենք բարեկեցության միջին փոփոխությունը, ոչ թե միջնարժեքը, անկումն ազդել է ավելի շատ երկրների վրա։ Թուրքիայում (-14,6%) և Բելգիայում (-0,3%) միջին ցուցանիշները նվազել են միջնարժեքների համեմատ։ Անկում է գրանցվել նաև Լյուքսեմբուրգում (-1,3%), Էստոնիայում (-2,3%), Ֆրանսիայում (-1,8%) և Մեծ Բրիտանիայում (-3,6%)։
