Բալիի միջազգային օդանավակայանում ձերբակալվել է 42-ամյա պերուացի կին, որը փորձել է մոտ 70 հազար դոլար արժողությամբ թմրանյութեր տեղափոխել, հաղորդում է BBC News-ը։
Ոստիկանության և մաքսային ծառայության աշխատակիցները նկատել են ուղևորի տարօրինակ վարքագիծը։
Ինչպես հայտնել է Radiant-ը՝ Բալիի թմրանյութերի դեմ պայքարի վարչության տնօրենը նշել է, որ անօրինական նյութերը թաքցված են եղել անսովոր ձևով. կոկաինի վեց պլաստիկ տոպրակները փաթաթված էին սև ժապավենով և տեղադրված էին կանաչ կրծկալի մեջ, երեք տոպրակները՝ սև ներքնազգեստի մեջ, իսկ մեկ այլ չափաբաժին թաքցված էր կնոջ մարմնի մեջ մտցված սեքս-խաղալիքի մեջ։ Ընդհանուր առմամբ առգրավվել է 1,4 կգ կոկաին և էքստազիի 43 հաբ։
Կինը ոստիկանությանը հայտնել է, որ համաձայնել է թմրանյութերը տեղափոխել 19 հազար դոլարով՝ այս տարվա ապրիլին մութ ցանցում հաճախորդի հետ հանդիպելուց հետո։ Նա ինդոնեզական կղզի է ժամանել օգոստոսի 12-ին Բարսելոնայից Դոհայով անցնող տարանցիկ չվերթով։
Կինը ձերբակալվել է և նրան մեղադրանք է առաջադրվել ըստ Ինդոնեզիայի թմրանյութերի մասին օրենքների։ Եթե նա մեղավոր ճանաչվի, նրան սպառնում է մահապատիժ։ Երկիրը հայտնի է թմրանյութերի մաքսանենգության համար իր խիստ պատիժներով և նախկինում արդեն մահապատիժ է կիրառվել օտարերկրացիների նկատմամբ։ Սակայն, 2017 թվականից գործում է մահապատիժների ժամանակավոր մորատորիում։
