Թուրքիայի նախագահ Ռեջեփ Թայիփ Էրդողանը Ստամբուլում ընդունել է Երուսաղեմի ուղղափառ եկեղեցու պատրիարք Թեոֆիլոս III-ին, հայտնում է «Անադոլու»-ն։
Ըստ նախագահի վարչակազմի հաղորդակցության վարչության, Էրդողանը նշել է, որ Իսրայելի գործողությունները Երուսաղեմում վնասում են քաղաքի պատմական կարգավիճակին և սրբությանը՝ սպառնալով մուսուլմանների, քրիստոնյաների և հրեաների համակեցության ավանդույթին, ինչն անընդունելի է։
Հանդիպման ընթացքում քննարկվել են Իսրայելի ագրեսիվ գործողությունները Գազայում և վատթարացող հումանիտար իրավիճակը։ Էրդողանը կրկին ընդգծել է, որ Իսրայելի քայլերը ուղղված են Երուսաղեմի պատմական կարգավիճակի խաթարմանը՝ վտանգելով կրոնական համայնքների համակեցությունը։
Նա նաև հայտարարել է, որ «ցեղասպան Նեթանյահուն՝ հարվածելով Քաթարին, ցույց է տվել, որ խաղաղության կողմնակից չէ»։ Ըստ Էրդողանի, Իսրայելը շարունակում է հարձակումները՝ առանց տարբերակելու մզկիթներն ու եկեղեցիները։ Նա հույս է հայտնել, որ հնարավոր կլինի պահպանել սերտ կապերը՝ Իսրայելի կողմից օկուպացված տարածքներում քրիստոնեական և մուսուլմանական ժառանգության պաշտպանության համար։
Հանդիպմանը մասնակցել են Թուրքիայի արտգործնախարար Հաքան Ֆիդանը, նախագահի վարչակազմի հաղորդակցության վարչության ղեկավար Բուրհանեթթին Դուրանը և նախագահի արտաքին քաղաքականության ու անվտանգության հարցերով գլխավոր խորհրդական, դեսպան Աքիֆ Չաղաթայ Քըլըչը։
