Իտալիայում հետաքննում են հանդուգն կողոպուտը, որը տեղի է ունեցել գիշերը Բոլոնիայի Կաստել-դ’Աիանո կոմունայի Սանտա Լուչիա բնակավայրում գտնվող Pieve Roffeno կոոպերատիվի պանրի գործարանում, գրում է Il Resto del Carlino-ն։
Անհայտ անձինք ներխուժել են ձեռնարկության տարածք և հափշտակել ավելի քան երկու հարյուր գլուխ պանիր՝ առնվազն 100 հազար եվրո արժողությամբ։
Կողոպտիչները հայտնվել են երեկոյան ժամը ութի սահմաններում, երբ բանվորներն արդեն տուն էին գնացել, և գրեթե վեց ժամ շարունակ հանգիստ տեղափոխել են պանրի ծանր գլուխները. յուրաքանչյուրը կշռում է մոտ քառասուններկու կիլոգրամ։ Նրանք շենք են մտել հետևի կողմից, որտեղ կա զառիթափ լանջ, ուստի ոչ ոք չէր սպասում, որ մուտքն այնտեղ կարող է խոցելի լինել։
Պանրի գործարանի գոյության վաթսուն տարվա ընթացքում նման դեպք այստեղ չէր եղել։ Նախնական տվյալներով, հանցագործները հափշտակել են առնվազն 191 գլուխ, սակայն վերջնական թիվը կարող է ավելի բարձր լինել։ Տեսահսկման տեսախցիկները ֆիքսել են, թե ինչպես են նրանք պանիրը բարձում երկու մեքենայում, ավելի ուշ պարզվել է, որ երկուսն էլ առևանգված են եղել։
Ենթադրվում է, որ այնուհետև մեքենաները շարժվել են Տոլայի ուղղությամբ, որտեղ չարագործներին, հավանաբար, բեռնատար էր սպասում՝ ավարը տեղափոխելու համար։ Կոոպերատիվի ղեկավար Դարիո Զապոլիի վկայությամբ, խոսքը հնեցված պարմեզանի մասին է, ինչը նշանակում է, որ հանցագործները հստակ գիտեին, թե ինչ էին փնտրում։ Ամեն ինչ լավ ծրագրված էր՝ սկսած ներթափանցման ուղուց մինչև դուրսբերման կազմակերպումը։
Կարաբիներներն արդեն ուսումնասիրում են տեսանյութերը և հարցաքննում վկաներին։ Կոոպերատիվում ուժեղացրել են անվտանգության միջոցառումները և հուսով են, որ վնասը մասամբ կկարողանան հատուցել ապահովագրության հաշվին։
