«Նոր Հայաստան» հանրային փրկության ճակատի անդամ Գեւորգ Սաֆարյանի պաշտպան Տիգրան Հայրապետյանն այսօր չի կարողացել տեսակցել նրա հետ՝ «Նուբարաշեն» ՔԿՀ-ում հոսանք չլինելու պատճառով: «Ամբողջ Էրեբունի համայնքում հոսանք չկար եւ ՔԿՀ պետը հանձնարարել էր որեւէ կալանավորի չտեսակցել: Դա այն դեպքում, երբ ես զանգեցի, հարցրեցի կարող եմ գալ տեսակցության, ասեցին՝ այո »,- «Ա1+»-ին ասաց փաստաբան Տիգրան Հայրապետյանը: Պաշտպանը, սակայն, հասցրել է պարզել, որ Գեւորգ Սաֆարյանին այլ խուց չեն տեղափոխել: Հիշեցնենք, որ Գեւորգ Սաֆարյանը ընդհանուր խցում վախենում էր բռնության ենթարկվել եւ հացադուլ էր հայտարարել, ինչի արդյունքում նա տեղափոխվել էր առանձին խուց: Հիշեցնենք, որ Գեւորգ Սաֆարյանին մեղադրանք է առաջադրվել Ոստիկանության 4-րդ հատուկ գումարտակի հրամանատար, ոստիկանության կապիտան (Հրեշտակապետ) Գեղամ Խաչատրյանի նկատմամբ բռնություն կիրառելու համար: Հիշեցնենք նաև, որ Ազատության հրապարակում Ամանորի գիշերը ընդդիմադիր «Նոր Հայաստան»-ի անդամների եւ ոստիկանների միջև բախումներ էին տեղի ունեցել: