Այսօր Երեւանի շախմատի տանը մեկնարկեց շախմատի Հայաստանի առաջնությունը: Առավել մեծ հետաքրքրություն է առաջացրել տղամարդկանց մրցաշարը, քանի որ 12 մասնակիցներից 9-ը գրոսմայստեր են: Իսկ ահա կանանց առաջնությունն անչափ թույլ կազմ է հավաքել: Զարմանալի չէ, որ Հայաստանի շախմատի ֆեդերացիայի պաշտոնական կայքում չի աշխատում այդ մրցաշարի ուղիղ միացում բաժինը: Տղամարդկանց առաջնության առաջին տուրը բավական արդյունավետ ստացվեց: Կայացած վեց պարտիաներից ոչ-ոքի ավարտվեց միայն Լեւոն Բաբուջյան – Մանուել Պետրոսյան հանդիպումը: Հայաստանի գործող չեմպիոն Կարեն Հ. Գրիգորյանն անհաջող սկսեց իր տիտղոսի պահպանման գործընթացը՝ սպիտակներով պարտվելով Հովիկ Հայրապետյանին: Իսկ ահա հանրապետության նախկին չեմպիոններ Ռոբերտ Հովհաննիսյանի եւ Տիգրան Լ. Պետրոսյանի սկզբունքային մրցավեճն անցավ անչափ լարված պայքարում եւ ավարտվեց 74-րդ քայլում առաջինի հաղթանակով: Միավոր վաստակեցին նաեւ Արման Փաշիկյանը, Զավեն Անդրիասյանը եւ Հովհաննես Գաբուզյանը, որոնք առավելության հասան համապատասխանաբար Սամվել Տեր-Սահակյանի, Արման Միքայելյանի եւ Նորայր Թորոսյանի նկատմամբ: Առաջնության երկրորդ տուրը տեղի կունենա վաղը, հունվարի 13-ին: Առավել սկզբունքային նշանակություն ունի Արման Փաշիկյան – Ռոբերտ Հովհանիսյան հանդիպումը, քանի որ երկու շախմատիստներն էլ հաղթանակով են սկսել չեմպիոնական մրցավազքը: