Ժամանակն է, որ պետական սեկտորը վերահսկողություն իրականացնի ռազմավարական նշանակության օբյեկտների վրա։ Այս մասին այսօր ՀՀ կոմունիստական կուսակցության նախընտրական ծրագիրը ներկայացնելիս ասաց կենտրոնական կոմիտեի առաջին քարտուղար, համապետական ցուցակը գլխավորող Տաճատ Սարգսյանը: «Սահմանադրությամբ ամրագրված է, որ ընդերքի հումքը ժողովրդի սեփականությունն է, փոխանակ այդ հումքի հիման վրա մենք զարգացնենք արդյունաբերությունը, զբաղված ենք այն վաճառելով»: Նա նաեւ մտահոգություն հայտնեց այն առիթով, որ գիտությանը հատկացվում է բյուջեի 0,1 տոկոսը, այն դեպքում, երբ զարգացած երկրներում այս ցուցանիշը հասնում է 2-3 տոկոսի. «Մենք պետք է զարգացնենք ռազմական արդյունաբերությունը, իսկ դրա հիմքը հենց գիտությունն է», — ընդգծել է Տաճատ Սարգսյանը։ Համապետական ցուցակի 2-րդ համարի տակ հանդես եկող Վիգեն Սաֆարյանը նշեց, որ անհրաժեշտ է վերահսկողություն սահմանել բանկերի գործունեության վրա, որպեսզի բաները սպասարկեն գյուղատնտեսությունն ու արդյունաբերությունը: Միաժամանակ պետք է փոխել հարկային քաղաքականությունը: «Աստիճանաբար պետք է հրաժարվել անուղղակի հարկերից, բյուջեն պետք է ձեւավորվի ուղղակի հարկերի հաշվին՝ շահութահարկով եւ եկամտահարկով»: Տաճատ Սարգսյանը հիշեցրեց նաեւ, թե ինչպիսին էր Հայաստանը, երբ կոմկուսը ստանձնեց երկրի ղեկավարումը, թվարկեց հաջողություններն ու անդրադարձավ ներկայիս խնդիրներին, մասնավորապես՝ գործազրկությանն ու արտագաղթին: «Մենք ուզում ենք ունենալ այնպիսի պետություն, որտեղ տղամարդիկ չեն գնում արտերկիր՝ աշխատանք որոնելու, որտեղ կանայք չեն գնում Թուրքիա՝ առեւտուր անելու, եւ երբեմն այնտեղ չափազանց երկար են մնում: Ամոթ է, որ մեր կանայք Թուրքիայում երկար ժամանակ են անցկացնում»,-ասաց Տ. Սարգսյանը: