Տասնվեց և տասնյոթ տարեկան երեխաները կկարողանան քվեարկել Մեծ Բրիտանիայի բոլոր ընտրություններում՝ ընտրական համակարգի 1969 թվականից ի վեր խոշորագույն բարեփոխման շրջանակում, հաղորդում է Sky News-ը։
Մեծ Բրիտանիայի կառավարությունը հայտարարել է, որ հաջորդ համընդհանուր ընտրություններում երիտասարդներին քվեարկելու իրավունք կտա, ինչն իր ծրագրում Լեյբորիստական կուսակցությունը խոստացել էր դեռ անցյալ ամռանը։
Նրանք արդեն կարող են քվեարկել Ուելսի Սենեդի և Շոտլանդիայի Հոլիրուդի ընտրություններում, սակայն դա նշանակում է, որ Մեծ Բրիտանիայի բոլոր չորս երկրներում 16 և 17 տարեկան բոլոր դեռահասները կկարողանան քվեարկել տեղական, տարածաշրջանային և համընդհանուր ընտրություններում։
IPPR վերլուծական կենտրոնի տվյալներով՝ այժմ մինչև 9,5 միլիոն մարդ կկարողանա քվեարկել։
Վերջին տվյալներով՝ քվեարկելու համար գրանցվել է 48 միլիոն 208 հազար 507 մարդ։ Վերջին անգամ ընտրական տարիքը փոխվել է 1969 թվականին, երբ այն 21-ից իջեցվել էր 18-ի։
Կառավարությունը հայտարարել է, որ փոփոխությունը «կխթանի ժողովրդավարական մասնակցությունը փոփոխվող աշխարհում և կնպաստի Մեծ Բրիտանիայում ժողովրդավարության նկատմամբ վստահության վերականգնմանը»։