Ուկրաինայի նախագահ Վլադիմիր Զելենսկին իր հրամանագրով պաշտպանության նախկին նախարար Ռուստեմ Ումերովին նշանակել է Ուկրաինայի ազգային անվտանգության և պաշտպանության խորհրդի քարտուղար և նրա առջև խնդիր է դրել ակտիվացնել Ռուսաստանի հետ «բանակցային ուղին», հայտնում է «Украинская правда»-ն։
Նախագահի առաջադրած խնդիրների թվում է շարունակել աշխատանքը գործընկերների հետ՝ զենքի վերաբերյալ պայմանավորվածությունների ուղղությամբ։ «Պետք է ամբողջությամբ իրականացնենք զենքի մատակարարման վերաբերյալ մեր գործընկերների հետ յուրաքանչյուր համաձայնագիր, ինչպես նաև համատեղ արտադրությունների ստեղծման և գործընկերների տարածքում գործարանների կառուցման վերաբերյալ նոր հատուկ պայմանավորվածությունները։
Երկրորդ խնդիրը ԱԱՊԽ-ի և Գերագույն գլխավոր հրամանատարի շտաբի (Ставка) ընդունած որոշումների կատարման վիճակի վերլուծությունն է, այն ամենի իրականացումը, ինչը հետաձգվել է, ինչպես նաև տեխնոլոգիական Ռազմական շտաբի ձևաչափի զգալի ամրապնդումը։
Որպես երրորդ խնդիր՝ Զելենսկին դրել է բանակցային ուղու ակտիվացումը։ Այժմ շարունակվում է Ստամբուլում երկրորդ հանդիպման պայմանավորվածությունների կատարումը։ Այս գործընթացում ավելի շատ դինամիկա է պետք»,- ասել է Զելենսկին։
Ավելի վաղ լրատվամիջոցները գրել էին, որ Ումերովին կարող են նշանակել ԱՄՆ-ում Ուկրաինայի դեսպան։