Բրիտանացի վիրաբույժ. Իսրայելցի զինվորները Գազայի հատվածում երեխաների վրա կրակում են այնպես, կարծես «խաղ են խաղում»

Բրիտանացի վիրաբույժ, պրոֆեսոր Նիք Մեյնարդը, որն աշխատում է Գազայի հատվածում, հայտարարել է, որ բուժաշխատողները «վնասվածքների հստակ օրինաչափություններ» են նկատում։

Նա ենթադրել է, որ Իսրայելի պաշտպանության բանակի (ՑԱՀԱԼ) զինվորները դիտավորյալ կրակում են Գազայի հատվածի երեխաների մարմնի տարբեր մասերին՝ կախված շաբաթվա օրվանից։

Պրոֆեսոր Նիք Մեյնարդը BBC Radio 4-ին պատմել է, որ ինքը և իր գործընկերները բախվել են անսովոր հաճախակի դեպքերի, երբ օգնության բաշխման վայրերում հրազենային վնասվածքներ ստացածները՝ հիմնականում դեռահաս տղաները, կարիք են ունեցել նույնատիպ վնասվածքների բուժման։

«Մի օր դրանք կլինեն որովայնի շրջանում հրազենային վիրավորումներ, մյուս օրը՝ գլխի կամ պարանոցի, երրորդ օրը՝ ձեռքերի կամ ոտքերի», — պատմել է նա։

«Սա խաղի է նման. այսօր նրանք որոշում են կրակել գլխին, վաղը՝ պարանոցին, մյուս օրը՝ ամորձիներին»,- հավելել է պրոֆեսորը։

ՑԱՀԱԼ-ն իր հերթին BBC հեռուստաալիքի համար հայտարարություն է տարածել, որում կտրականապես հերքում է պրոֆեսոր Մեյնարդի պնդումները։