Գերմանիայի հյուսիս-արևմուտքում կիրակի օրը տեղի է ունեցել չափազանց արտասովոր վթար, որի հետևանքով տուժել է մի քանի մարդ, այդ թվում՝ 7-ամյա տղա, հայտնում է Associated Press-ը։
Միջադեպը տեղի է ունեցել Բոմտե քաղաքում. ավտոմեքենան սկզբում բախվել է կայանված մեքենային, այնուհետև ճեղքել է կանաչ ցանկապատը, մտել մասնավոր այգի, որտեղ վրաերթի է ենթարկել բատուտի վրա խաղացող տղային։
Դրանից հետո, անհարթ մակերևույթով ընթանալով, մեքենան օդ է բարձրացել և մոտ 3 մետր բարձրության վրա բախվել հարևան տնտեսական կառույցի տանիքին։
Տղան լուրջ վնասվածքներ է ստացել։ Ըստ ոստիկանության տվյալների, ղեկին եղել է 42-ամյա տղամարդ, որի ինքնությունը դեռևս չի բացահայտվում։ Նրա կինը նույնպես ծանր վնասվածքներ է ստացել։ Ավտոմեքենայի սրահում են գտնվել նրանց 11 և 12 տարեկան որդիները, ինչպես նաև 13-ամյա մեկ այլ ուղևոր. բոլոր երեքը, ինչպես և հենց վարորդը, ազատվել են թեթև վնասվածքներով։
Դեպքի վայր են ժամանել տասնյակ փրկարարներ, այդ թվում՝ 12 շտապօգնության մեքենա և երկու ուղղաթիռ։ Հրշեջները կտրել են տանիքի մի մասը և խաղահրապարակի բեկորները՝ մեքենային հասնելու համար։
Մեքենան ամբարձիչի օգնությամբ դուրս են բերել, որից հետո ոստիկանները տարել են այն։ Դեպքի պատճառների վերաբերյալ հետաքննություն է ընթանում։
Ըստ նախնական տվյալների, վթարը կարող էր տեղի ունենալ կառավարումը կորցնելու կամ տեխնիկական անսարքության պատճառով։ Իշխանությունները շարունակում են պարզել տեղի ունեցածի բոլոր հանգամանքները։