Գյումրիի Հաղթանակի պողոտայում՝ «Հացատուն» սննդի կետի մոտ, դեռեւս մեկ ամիս առաջ տեղի ունեցած ծեծկռտուքի ու կրակոցի գործով երեք անձի նկատմամբ քրեական հետապնդում է նախաձեռնվել։
Հիշեցնենք, որ կրակոցների դեպքի առթիվ նախաձեռնված է քրեական վարույթ ՀՀ ՔՕ 195-րդ հոդվածի 2-րդ մասի 5-րդ կետով (մի խումբ անձանց կողմից ֆիզիկական ներգործությունը), 297-րդ հոդվածի 3-րդ մասով (խուլիգանությունը) և 335-րդ հոդվածի 1-ին մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) հոդվածներով:
NEWS.am–ին Քննչական կոմիտեից հայտնեցին, որ քրեական վարույթի նախաքննության ընթացքում 3 անձի նկատմամբ հանրային քրեական հետապնում է հարուցվել: Նրանցից մեկի նկատմամբ որպես խափանման միջոց կիրառվել է տնային կալանքը, բացակայելու արգելքը և գրավը, մյուս 2-ի նկատմամբ ընտրվել է կալանքը, հայտարարվել է հետախուզում:
Մամուլի տեղեկություններով, տնային կալանքում է գտնվում «Հացատուն» սննդի կետի տերը՝ Արտյոմ Գրիգորյանը: Հետախուզվողներից մեկը ԱԺ պատգամավոր Մարտուն Գրիգորյանի որդին է՝ Կամո Գրիգորյանը, մյուսը Գիրգորյան ընտանիքի քավոր, տարիներ առաջ սպանված «Շեկո» անունով հայտնի անձի որդին՝ Վաչագան Կարապետյանը: