Հորդանանից, Իսրայելից, Լիբանանից և Իսպանիայից ինքնաթիռներ են ժամանել հինգշաբթի՝ Կիպրոսում երկու մարդու կյանք խլած հսկայական անտառային հրդեհի դեմ պայքարելու համար, հայտնում է Associated Press-ը ։
Ոստիկանությունը հետաքննում է այն հաղորդագրությունները, ըստ որոնց՝ անտառապատ լանջերի ավելի քան 120 քառակուսի կիլոմետր տարածք ընդգրկած հրդեհի համար մեղավոր են հրկիզողները:Այդ հրդեհը վերջին ժամանակներում ամենասարսափելի նմանատիպ հրդեհներից մեկն էր։
«Երեկվանից (չորեքշաբթի) մենք գործ ունենք աննախադեպ իրավիճակի հետ, — լրագրողներին հայտնել է Կիպրոսի նախագահ Նիկոս Քրիստոդուլիդեսը։ -Կիպրոսում նման բան երբեք չէր եղել»։
Հրդեհը, որը, կարծես, գիշերը մարել էր, հինգշաբթի կրկին բռնկվել է մի քանի ուղղություններով։ Հրդեհը մարելու համար աշխատում են ավելի քան 250 հրշեջ, 75 հրշեջ ավտոմեքենա և 14 ինքնաթիռ, հայտնել է Կառավարության ներկայացուցիչ Կոնստանտինոս Լետիմբիոտիսը։
Նա նշել է, որ երեք ձմեռներից հետո շատ ուժեղ քամիները, բարձր ջերմաստիճանը և նվազագույն տեղումներով պայմանավորված խիստ չորային պայմանները հանգեցրին նրան, որ անտառային հրդեհը չորեքշաբթի երեկոյան հասավ իր գագաթնակետին։
Հրշեջ խմբերը դժվարությամբ էին մարում կրակը դժվարանցանելի, բլրոտ տեղանքում։ Հրշեջ ծառայության ներկայացուցիչ Անդրեաս Կետիսը նշել է, որ Օմոդոս գինեգործական գյուղի մոտակայքում բռնկված հրդեհը առանձնապես դժվար է եղել մարել։
Կիպրոսի նախագահ նշել է, որ կան դրական նշաններ, որ հրդեհը, կարծես, նվազում է, բայց նա չի կարող ասել, որ դեռ ամեն ինչ վերահսկողության տակ է։
Նա վերահաստատել է կառավարության խոստումը՝ օգնել իրենց ապրուստը կորցրած մարդկանց և գույքի սեփականատերերին վերականգնել իրենց ավերված տները։