Բրիտանական Financial Times գործարար պարբերականը, հղում անելով իր աղբյուրներին, հաղորդում է, որ նախագահի Գերագույն Ռադայի՝ «Ժողովրդի ծառա» կուսակցության շուրջ 70 պատգամավոր չի ցանկանում քվեարկել նոր օրինագծի օգտին, որը կվերականգնի Ազգային հակակոռուպցիոն բյուրոյի անկախությունը։
Ըստ պարբերականի աղբյուրների՝ նախագահ Վլադիմիր Զելենսկիի կուսակցության պատգամավորները վախենում են, որ կոռուպցիայի դեմ պայքարի մարմինները վրեժ կլուծեն իրենցից օրենքի ներկա տարբերակին աջակցելու համար, որն, ըստ էության, Ազգային հակակոռուպցիոն բյուրոյին ենթարկում է գլխավոր դատախազությանը։
Նման մտահոգությունների հիմքում ընկած էր Հատուկ հակակոռուպցիոն դատախազության (NABU-ի հետ համատեղ աշխատող գործակալություն) ղեկավար Ալեքսանդր Կլիմենկոյի հետ հարցազրույցը, նշում է հրատարակությունը։
Կլիմենկոն Ուկրաինայի հանրային հեռարձակող «Суспільне»-ին ասել է, որ իր գերատեսչությունը «հավաքում է ամբողջ տեղեկատվությունն» այն մասին, թե ինչպես է Ռադան ընդունել NABU-ի մասին առաջին օրենքը։ «Մենք կվերլուծենք բոլոր իրավիճակները, իրադարձությունները, հայտարարությունները, մեր դեմ ներկայացված բոլոր մեղադրանքները, պնդումները։ Հատ առ հատ: Մենք կվերստեղծենք իրադարձությունների ժամանակագրությունը վայրկյան առ վայրկյան և կներկայացնենք այդ ամենի վերլուծությունը»,- ասել է Կլիմենկոն։
«Մարդիկ վախենում են, որ իրենց անարդարացիորեն կհետապնդեն՝ վրեժխնդրության համար», — Financial Times -ին ասել է անանուն պատգամավորը, որին FT-ն անվանել է «Զելենսկու խորհրդարանական խմբակցության առաջատար առաջնորդներից մեկը»։
Ինչպես նշվում է հրապարակման մեջ, որոշ պատգամավորներ այնքան վճռական են տրամադրված, որ նախընտրում են հրաժարվել իրենց մանդատներից, քան քվեարկել Զելենսկու կողմից առաջարկված NABU-ի մասին նոր օրենքի օգտին։
Սակայն, FT-ին տված մեկնաբանության մեջ Կլիմենկոն ընդգծել է, որ NABU-ն և SAP-ը «երբեք քաղաքական հետապնդումներ չեն իրականացրել» և «վախենալու հիմքեր ունեն միայն կոռուպցիոն սխեմաներում ներգրավված մարդիկ»։
Ռադայի խոսնակ Ռուսլան Ստեֆանչուկը հայտարարել է, որ կոռուպցիայի դեմ պայքարի մարմինների անկախությունը վերականգնելու մասին օրինագիծը կքննարկվի հուլիսի 31-ին։
Սակայն, ինչպես գրում է FT-ն, հաշվի առնելով «Ժողովրդի ծառա» խմբակցության ներսում առկա առճակատումը, քվեարկությունը կարող է հետաձգվել կամ անցկացվել այնպիսի ժամանակ, երբ նիստերի դահլիճում բավարար թվով պատգամավորներ չեն լինի որոշում ընդունելու համար։