Ուկրաինան Ռուսաստանի ներկայացուցիչների հետ բարձր մակարդակի հանդիպում անցկացնելու առաջարկ է արել։ Խոսքը բանակցությունների նոր փուլի մասին է, որին պետք է ներկա լինեն Ուկրաինայի, Ռուսաստանի, ԱՄՆ-ի, Թուրքիայի և եվրոպական պետությունների ղեկավարները, հայտարարել է Ուկրաինայի նախագահ Վլադիմիր Զելենսկին, հայտնում է РБК-Украина-ն։
Զելենսկին պատմել է, որ առարկայական զրույց է ունեցել Ֆրանսիայի նախագահ Էմանուել Մակրոնի հետ։
Նա նշել է, որ բանակցությունների ընթացքում ֆրանսիացի գործընկերոջը տեղեկացրել է Ստամբուլում ռուսական կողմի հետ երրորդ հանդիպման արդյունքների մասին։
«Մեզ հաջողվեց պայմանավորվել գերիների նոր փոխանակման շուրջ։ Սպասում ենք մեր առաջարկի պատասխանին՝ մինչև օգոստոսի վերջը բարձր մակարդակի հանդիպում անցկացնելու վերաբերյալ։ Դրան պարտադիր պետք է ներկա լինեն Եվրոպայի ներկայացուցիչները», — պատմել է Ուկրաինայի նախագահը։
Ռուսաստանի և Ուկրաինայի միջև բանակցությունների վերջին փուլը տեղի է ունեցել Ստամբուլում հուլիսի 23-ին։
Ավելի ուշ Թուրքիայի ԱԳ նախարար Հաքան Ֆիդանը հայտնել է, որ սկզբունքորեն երկու կողմերն էլ համաձայնել են Զելենսկու և Ռուսաստանի նախագահ Վլադիմիր Պուտինի գագաթնաժողովի անցկացմանը, սակայն հանդիպման անցկացման պայմանների հետ կապված տարակարծիք են։