Թրամփի ինքնաթիռի վերանորոգումը ֆինանսավորվել է միջուկային ուժերի ծրագրից

ԱՄՆ նախագահը Պենտագոնի միջուկային զինանոցի արդիականացման համար գաղտնի ծախսերի մեջ ներառել է նաև Կատարի թագավորական ընտանիքի՝ իրեն նվիրաբերած Boeing 747-8 ինքնաթիռի վերանորոգման արժեքը, գրում է The New York Times-ը։

Պարբերականի տվյալներով՝ ԱՄՆ պաշտպանության նախարարությունը պաշտոնապես բյուջեից 934 միլիոն դոլար է խնդրել՝ ամերիկյան ցամաքային միջուկային հրթիռների հնացած տարբերակն արդիականացնելու համար։ Սակայն DW-ն գրում է, որ Կոնգրեսի գրասենյակում «գրեթե վստահ են», որ այդ միջոցների մի մասը կուղղվի Դոնալդ Թրամփի նախագահական ինքնաթիռի վերանորոգմանը։ Այդ տեղեկությունն անանուն կերպով հաստատել են The New York Times-ը և ԱՄՆ ռազմաօդային ուժերի ներկայացուցիչները։

Մասնագետների գնահատմամբ՝ նախագահական կարիքները բավարարելու համար Կատարի նվիրաբերած ինքնաթիռի արդիականացումը կտևի շուրջ երկու տարի։ Միևնույն ժամանակ, նույն Boeing 747-8-ի արտադրությունն Ամերիկայում կարժենա մոտավորապես 400 միլիոն դոլար։ Թրամփը շրջանցել է նվերների սահմանափակումները՝ ինքնաթիռը ժամանակավորապես հանձնելով ԱՄՆ ռազմաօդային ուժերի նավատորմին։