Պաղեստինի պետությունը ճանաչելու հարցը դիտարկող երկրների առաջնորդները պետք է այն հաստատեն իրենց մայրաքաղաքներում, հայտարարել է Քնեսեթի խոսնակ Ամիր Օհանան Ժնևում անցկացված Միջխորհրդարանական միության խորհրդարանների խոսնակների վեցերորդ համաշխարհային համաժողովում իր ելույթում, հաղորդում է Times of Israel-ը։
«Հոկտեմբերի 7-ի իրադարձությունների լույսի ներքո Պաղեստինի պետությունը ճանաչելու ՀԱՄԱՍ-ին խրախուսումը կայունություն, համակեցություն և համագործակցություն չի բերի։ Դա կհանգեցնի իսրայելցիների և հրեաների ավելի շատ սպանությունների։ Եթե դա եք ուզում, եթե ուզում եք այն, ինչ անվանում եք Պաղեստինի պետություն, ստեղծեք այն Լոնդոնում, Փարիզում, ձեր երկրներում։ Այսպես կոչված խաղաղությունը, որի համար պայքարում են որոշ եվրոպական երկրներ, միայն նոր պատերազմի կհանգեցնի։ Մինչդեռ մեր մղած պատերազմը կհանգեցնի խաղաղության»,- հայտարարել է նա՝ իր միջազգային գործընկերներին կոչ անելով «պաշտպանել ճշմարտությունը, այլ ոչ թե քարոզչությունը» և «մնալ պատմության ճիշտ կողմում՝ մեր կողմում»։
Օհանայի ելույթի ժամանակ Իրանի, Եմենի և Պաղեստինի ինքնավարության խորհրդարանականները լքել են դահլիճը։
Մեծ Բրիտանիայի վարչապետ Քեյր Սթարմերը երեքշաբթի հայտարարել է, որ Մեծ Բրիտանիան սեպտեմբերին կարող է ճանաչել Պաղեստինի պետությունը, եթե Իսրայելը չբարելավի իրավիճակը Գազայում և քայլեր չձեռնարկի խաղաղության ուղղությամբ։ Ֆրանսիան նույնը հայտարարել էր մի քանի օր առաջ, թեև առանց որևէ պայմանի, Սթարմերի հայտարարությունը Մալթային դրդել է հետևել Լոնդոնի օրինակին։
Ավելի ուշ 15 արևմտյան երկրներ Պաղեստին պետությունը ճանաչելու կոչ են արել աշխարհին։
Հոկտեմբերի 7-ից ի վեր Պաղեստինը ճանաչել են Նորվեգիան, Իսպանիան, Իռլանդիան և Սլովենիան։