Բրիտանական նավթագազային BP (British Petroleum) ընկերությունը երկուշաբթի՝ օգոստոսի 4-ին, հայտարարել է Բրազիլիայի ափերի մոտ ձեռնարկության համար վերջին 25 տարվա ընթացքում նավթի և գազի խոշորագույն հանքավայրի հայտնաբերման մասին։ «Բումերանգ» անվանումը ստացած հանքավայրը հայտնաբերվել է երկրի հարավարևելքում գտնվող Սանտոսի ավազանում՝ Ռիո դե Ժանեյրոյից 404 կիլոմետր հեռավորության վրա։
Հանքավայրը գտնվում է Ատլանտյան օվկիանոսում՝ աղի շերտի տակ։ BP-ն այն տարածքում, որտեղ հայտնաբերվել է հանքավայրը, օգտակար հանածոների արդյունահանման իրավունքը ստացել է 2022 թվականի դեկտեմբերին կայացած աճուրդում։ Ընկերության կողմից 5855 մետր խորությամբ հորատված հորատանցքը բացել է օգտակար հանածոների պաշարներ՝ ավելի քան 300 քառակուսի կիլոմետր ընդհանուր մակերեսով։
Նշվում է, որ ածխաթթու գազի բարձր կոնցենտրացիաները կարող են բարդացնել արդյունահանումը և բարձրացնել վերամշակման արժեքը։ Այժմ BP-ն լրացուցիչ լաբորատոր հետազոտություններ է անցկացնում, որոնք թույլ կտան ճշգրիտ որոշել հանքավայրի ներուժը։
«Բումերանգը» BP-ի կողմից 2025 թվականին հայտնաբերված նավթի և գազի տասներորդ հանքավայրն է։ Մինչ այդ ընկերության մասնագետները հանքավայրեր էին հայտնաբերել ոչ միայն Բրազիլիայում, այլև Տրինիդադում, Եգիպտոսում, Մեքսիկական ծոցում, Լիբիայում, Նամիբիայում և Անգոլայում։
Մինչև «Բումերանգը» բրիտանական ընկերության պատմության մեջ 25 տարի շարունակ ամենամեծ հանքավայրը մնում էր «Շահ Դենիզը», որը հայտնաբերվել էր Ադրբեջանում 1999 թվականին։ Ադրբեջանական լրատվամիջոցների տվյալներով, դրա մակերեսը գերազանցում է 140 քառակուսի կիլոմետրը։ BP-ն հանդես է գալիս որպես հանքավայրի օպերատոր, սակայն այնտեղ արդյունահանում են իրականացնում նաև ռուսաստանյան մասնավոր «Լուկօյլ» ընկերությունը, ինչպես նաև ադրբեջանական և թուրքական պետական ընկերությունները՝ SOCAR-ը և TPAO-ն։