Մինչ գերմանական ավտոմոբիլային արդյունաբերությունը տեղապտույտ է տալիս, երկրի խոշորագույն պաշտպանական ընկերությունը՝ Rheinmetall-ը, ռեկորդային շահույթ է ապահովում, գրում է գերմանական Bild պարբերականը: Այս տարվա առաջին կեսին ընկերության եկամուտն աճել է 24%-ով՝ հասնելով 4,7 միլիարդ եվրոյի, մինչդեռ զուտ շահույթը կազմել է 475 միլիոն, ինչը նախորդ տարվա համեմատ 18%-ով ավելի է:
«Rheinmetall-ը հաջողությամբ առաջ է շարժվում, որպեսզի պաշտպանական արդյունաբերության ոլորտի համաշխարհային չեմպիոն դառնա: Մեր պատվերների պորտֆելներն արդեն լիքն են և կշարունակեն աճել»,- հայտարարել է ընկերության գործադիր տնօրեն Արմին Պապերգերը:
Ընկերությունն այժմ ունի 63 միլիարդ եվրոյի պատվերներ, որոնք պետք է կատարվեն: Այդ աճը պայմանավորված է զենքի պահանջարկի կտրուկ աճով՝ Ուկրաինա Ռուսաստանի լայնածավալ ներխուժման սկսվելուց հետո:
Rheinmetall-ն ակտիվորեն ընդլայնում է արտադրությունը՝ կառուցելով գործարաններ, քաղաքացիական ձեռնարկությունները վերածելով ռազմական արտադրության և Եվրոպայում նոր հզորություններ բացելով:
«Մեծ ջանքեր ենք գործադրում մեր եկամուտը զգալիորեն մեծացնելու համար և ներդրումներ ենք կատարում տարբեր երկրներում՝ նոր արտադրական հզորություններ ստեղծելու համար»,- շեշտել է Պապերգերը։
Rheinmetall-ը շուտով կբացի Եվրոպայի ամենամեծ զինամթերքի գործարանը Ստորին Սաքսոնիայի Ունտերլյուս քաղաքում։ Նոյսում ռազմական տեխնիկայի արտադրությունը ևս ընդլայնվում է։
Ավտոմոբիլային բիզնեսը, որը նախկինում Rheinmetall-ի կարևոր մասն էր կազմում, այժմ մղվում է երկրորդ պլան։ Այդ ոլորտում եկամուտը նվազել է, և խումբն արդեն բանակցություններ է վարում բիզնեսի վաճառքի շուրջ։