Ուկրաինան պատրաստ է քննարկել Ռուսաստանի հետ օդային զինադադարի տարբերակը, իտալական Corriere della Sera թերթին տված հարցազրույցում հայտարարել է Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը։
Նրա խոսքով՝ Վաշինգտոնը կրակի լիակատար դադարեցում է առաջարկել, ինչպես նաև հրաժարվել հրթիռային հարվածներից և անօդաչու թռչող սարքերի հարձակումներից։
«Այս սցենարներից ոչ մեկը չի ընդունվել Ռուսաստանի կողմից։ Օդային հարվածները առանցքային գործիք են, որի միջոցով Մոսկվան հոգեբանական ճնշում է գործադրում Ուկրաինայի վրա։ <…> Ռուսաստանը դժվար թե ցանկանա զրկվել ավիացիա և անօդաչու թռչող սարքեր զանգվածաբար կիրառելու հնարավորությունից։ Սակայն Ուկրաինան պատրաստ է քննարկել դա, պատրաստ է քննարկել այս սցենարը և համարում է այն իրատեսական բանակցությունների սկզբնական փուլ»,- ասել է Պոդոլյակը։
Ուկրաինայի նախագահ Վոլոդիմիր Զելենսկին օգոստոսի 5-ին ասել է, որ լիովին աջակցում է ԱՄՆ նախագահ Դոնալդ Թրամփի՝ անհապաղ զինադադարի մասին առաջարկը։ «Մենք արդեն բազմաթիվ տարբեր ձևաչափերով փորձել ենք հասկանալ, թե ինչպես կարելի է դադարեցնել կրակը, ինչպես կարելի է դադարեցնել սպանությունները։ Մենք խոսել և Ռուսաստանին առաջարկել ենք լռություն երկնքում, հրթիռային հարվածների և անօդաչու թռչող սարքերի հարձակումների բացակայություն՝ քաղաքացիական ենթակառուցվածքների և էներգետիկայի վրա։ Այս ամենը խախտվել է ռուսների կողմից»,- պնդել է Զելենսկին։