Միավորված Ազգերի Կազմակերպությունը (ՄԱԿ) ռուս զինվորների կողմից ուկրաինացիների նկատմամբ սեռական բռնության բազմաթիվ դեպքեր է գրանցել։ Այդ մասին ասվում է ՄԱԿ-ի գլխավոր քարտուղար Անտոնիո Գուտերեշի՝ հակամարտության հետ կապված բռնության վերաբերյալ ամենամյա զեկույցում, որը ներկայացվել է կազմակերպության Անվտանգության խորհրդին։
Նա նաև հայտարարել է, որ «լրջորեն մտահոգված է» ռուս զինվորների կողմից բռնության մասին ստացվող հաղորդագրություններով և ընդգծել, որ «նկատողություն է արել» Ռուսաստանին նման գործողությունների համար։ Գուտերեշը զգուշացրել է, որ հաջորդ տարի Ռուսաստանի Դաշնությունը կարող է ներառվել այն կողմերի ցուցակում, որոնք «հիմնավոր կերպով կասկածվում են բռնաբարության կամ սեռական բռնության այլ ձևեր կատարելու կամ դրանց համար պատասխանատու լինելու մեջ»։ Նմանատիպ զգուշացում նա արել է նաև Իսրայելին։
ՄԱԿ-ում Ռուսաստանի ներկայացուցչությունը չի արձագանքել լրագրողների խնդրանքին՝ Գուտերեշի զեկույցը մեկնաբանելու վերաբերյալ։ ՄԱԿ-ի գլխավոր քարտուղարն ասել է, որ ռուսական իշխանությունները նշված հարցերով չեն համագործակցել իր հատուկ բանագնացի հետ։
2024 թվականի զեկույցում ՄԱԿ-ը նշել է, որ ռուսական գերության մեջ գտնվող ուկրաինացի ազատ արձակված ռազմագերիների 95%-ը պարբերաբար ենթարկվել է խոշտանգումների։ Զինծառայողները որպես տանջանքի մեթոդներ նշել են ծեծը, էլեկտրահարումը, խեղդամահ անելը, սեռական բռնությունը, երկարատև ցավոտ դիրքերում պահելը, մահապատժի իմիտացիան, ջրահեղձ անելը, քնից զրկելը և այլ խոշտանգումներ։
Հուլիսին Եվրոպայում անվտանգության և համագործակցության կազմակերպության (ԵԱՀԿ) անդամ ավելի քան 40 պետություններ կոչ են արել անկախ հետաքննություն անցկացնել ուկրաինացի ռազմագերիների նկատմամբ՝ Ռուսաստանի դաժան վերաբերմունքի փաստերի վերաբերյալ, հայտնել է Նիդերլանդների արտաքին գործերի նախարար Կասպար Վելդկամպը։