Օգոստոսի 13-ի գիշերը ուկրաինական անօդաչու թռչող սարքերը հարձակվել են Վոլգոգրադի մարզի վրա, հայտնել է մարզի նահանգապետ Անդրեյ Բոչարովը։
Վոլգոգրադի Տրակտորոզավոդսկի շրջանում անօդաչու թռչող սարքի բեկորներ են ընկել Օպոլչենսկայա փողոցի 16-հարկանի բնակելի շենքի տանիքին։ Նախնական տվյալներով՝ տուժածներ չկան։ Նահանգապետը քաղաքային իշխանություններին հանձնարարել է «անօդաչու թռչող սարքի բեկորների անկման հետևանքների վերացման ընթացքում» ժամանակավոր կացարան գտնել շենքի բնակիչների համար։
«Վոլգոգրադ» Telegram ալիքը գիշերը գրել է, որ անօդաչու թռչող սարքեր են թռեկ տեղի նավթավերամշակման գործարանի ուղղությամբ։ «[Անօդաչուների] մի մասը խոցվել է մարզում և քաղաքի հարավում»,- ասվում է գրառման մեջ։
Ռոսավիացիայի հաղորդագրության համաձայն՝ Վոլգոգրադի օդանավակայանը երեք ժամ շարունակ չի ընդունել և չի ուղարկել չվերթեր։
ՌԴ Պաշտպանության նախարարությունը հայտնել է, որ գիշերը ՀՕՊ ուժերը ոչնչացրել են ուկրաինական 46 անօդաչու թռչող սարք։ Դրանցից 15-ը խոցվել է Բրյանսկի մարզի, 11-ը՝ Վոլգոգրադի, 7-ը՝ Դոնի Ռոստովի, 5-ը՝ Կրասնոդարի երկրամասի, իսկ 2-ական անօդաչու՝ Բելգորոդի, Վորոնեժի մարզերի, բռնակցված Ղրիմի և Ազովի ծովի ջրային տարածքի վրա։