ԱՄՆ-ն պատրաստ է մասնակցել Ուկրաինային անվտանգության երաշխիքներ տրամադրելուն։ Այս մասին շաբաթ օրը հայտարարել է Գերմանիայի կանցլեր Ֆրիդրիխ Մերցը՝ ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի միջև Ալյասկայում կայացած գագաթնաժողովի հաջորդ օրը։
«Եվ լավ նորությունն այն է, որ Ամերիկան պատրաստ է մասնակցել անվտանգության նման երաշխիքներին և դա չի թողնում բացառապես եվրոպացիների հայեցողությանը», — ասել է Մերցը գերմանական ZDF հանրային հեռուստաալիքին այն բանից հետո, երբ Թրամփը, եվրոպացի մյուս առաջնորդների հետ, իրեն տեղեկացրել է Պուտինի հետ բանակցությունների մասին։
Ուկրաինայի նախագահ Վլադիմիր Զելենսկին երկուշաբթի օրը Վաշինգտոնում պետք է հանդիպի Թրամփի հետ, որից հետո պետք է հնարավորինս շուտ կայանա եռակողմ հանդիպում Պուտինի, Թրամփի և Զելենսկու միջև՝ խաղաղության համաձայնագրի հասնելու նպատակով, հայտարարել է Մերցը։ «Եթե դա ստացվի, դա ավելին կարժենա, քան հրադադարը», — ասել է նա։
Ըստ Մերցի, Թրամփը հասկացրել է, որ Ռուսաստանը, կարծես, պատրաստ է բանակցություններ վարել՝ հիմնվելով հակամարտության շփման գծի, այլ ոչ թե Ուկրաինայի այն մարզերի սահմանների վրա, որոնց հավակնում է։
«Սա հսկայական տարբերություն է, քանի որ Ռուսաստանը հավակնում է տարածքների, որոնք դեռ չի օկուպացրել», — ասել է նա։
Մերցը նշել է, որ թեև կարևոր է, որ Եվրոպան միասնական լինի, ԱՄՆ-ն առայժմ կշարունակի վճռորոշ դեր խաղալ պատերազմում, որը շարունակվում է 2022 թվականից։
«Ամերիկայի նախագահը բավականաչափ իշխանություն ունի ինչպես ռազմական առումով, այնպես էլ համապատասխան պատժամիջոցների և սակագների միջոցով՝ երաշխավորելու, որ Ռուսաստանը կգործի ավելի ակտիվ, քան անում է ներկայումս», — ասել է Գերմանիայի կանցլերը։
Ավելի ուշ n-tv հեռուստաընկերությանը տված հարցազրույցում Մերցն ասել է, որ չի կարծում, թե Զելենսկու համար Վաշինգտոնում Թրամփի հետ այնքան դժվար կլինի, որքան փետրվարին, երբ երկու առաջնորդները Սպիտակ տանը համաշխարհային լրատվամիջոցների առջև կարծիքների անսովոր փոխանակման ընթացքում բախվեցին։
Ըստ նրա, Զելենսկին կիրակի օրը կզրուցի եվրոպացի առաջնորդների հետ, որոնք կօգնեն նրան նախապատրաստվել հանդիպմանը։
«Նրան մի քանի լավ խորհուրդ կտանք», — ասել է նա։