Ուկրաինայի և Ռուսաստանի միջև ապագա մշտական խաղաղության համաձայնագրի հիմքում կլինեն Ուկրաինայի անվտանգության երաշխիքները, հաղորդում է BBC-ն։ Դրանք կրկին քննարկվել են այսօր եվրոպացի առաջնորդների հետ հանդիպման ժամանակ։
ԱՄՆ-ն մինչ օրս դժկամությամբ է պարտավորություններ ստանձնել՝ թողնելով դա Մեծ Բրիտանիային և Ֆրանսիային և նրանց «Կամավորների կոալիցիային»։ Սակայն Սպիտակ տան մեկնաբանությունները ենթադրում են, որ ԱՄՆ-ն այժմ կարող է պատրաստ լինել օգնել։
Ի՞նչ ձև կարող է ունենալ դա։ Գոյություն ունի չորս հիմնական տարբերակ։
Ցամաքային զորքեր։ Դա ամենաքիչ հավանական սցենարն է։ Դոնալդ Թրամփն այս պատերազմը համարում է եվրոպական խնդիր, մի բան, որը, ինչպես ինքն է ասում՝ «երբեք չէր լինի, եթե ես լինի իշխանության գլուխ»։ Նրա համար ցամաքային զորքեր ուղարկելը, նույնիսկ որպես խաղաղապահներ, այնպիսի հակամարտության, որը նրա համար խորապես ատելի է, 180 աստիճանի շրջադարձ կլինի։
Օդային և ծովային պարեկություններ։ Սա ավելի հավանական է։ ԱՄՆ ռազմաօդային ուժերն արդեն իսկ իրականացնում են դիտորդական թռիչքներ Սև ծովի և մյուս շրջաններում՝ այս պատերազմի ընթացքը վերահսկելու համար։ Բայց, իհարկե, կա հսկայական տարբերություն ոչ բախումային հետախուզական թռիչքի կամ ծովային պարեկության և Ռուսաստանի նման միջուկային տերության հետ զինված հակամարտության մեջ մտնելու պատրաստ լինելու միջև։
Հետախուզություն։ ԱՄՆ արբանյակային և օդային հետախուզությունը կենսական նշանակություն են ունեցել Ուկրաինային ռուսական ուժերի առաջխաղացումը զսպելու հարցում օգնելու համար։ Բոլոր կողմերի համաձայնեցրած խաղաղության համաձայնագրի դեպքում սա այն ոլորտներից մեկն է, որտեղ ԱՄՆ-ն, հավանաբար, ուրախ կլինի օգնել։
Լոգիստիկա։ Անկախ նրանից, թե ինչ ձև կընդունեն Մեծ Բրիտանիայի և Ֆրանսիայի գլխավորած «հաստատող ուժերը» խաղաղության համաձայնագրի դեպքում, դրանք լոգիստիկ աջակցության զգալի կարիք կունենան։ Չնայած Թրամփի վարչակազմն ազդանշան է տվել, որ ձգտում է կրճատել իր ռազմական ներկայությունը Եվրոպայում, դա այն ոլորտներից մեկն է, որտեղ Վաշինգտոնը, հավանաբար, ուրախ կլինի օգնել։